Proverbios 14:1-35
14 Yachayniyoq warmiqa wasintan sayarichin,+mana yuyayniyoq warmin ichaqa makinkunallawantaq thunin.
2 Allin kausaypi puriqqa Jehová Diostan manchakun,mana allinta kausaqmi ichaqa Diosta pisichan.
3 Mana yuyayniyoqkunaq jatunchakuspa rimasqanqa varawan waqtay jinan,yachayniyoqkunatan ichaqa rimasqanku pakaykunqa.
4 Waka mana kaqtinqa limpion kashan uywa qaranaqa,toroq kallpanwanmi ichaqa askha mijuyta oqarikun.
5 Junt’aq sonqo testigoqa manan llullakunqachu,llulla testigon ichaqa sapa rimaspa llullakun.+
6 Burlakuq runaqa yachaytan maskhan manataq tarinchu,allin reparaq runan ichaqa facil-llata imatapas yachan.+
7 Mana yuyayniyoq runamanta karunchakuy,paypa siminpiqa manan ima yachaytapas tarinkichu.+
8 Allin yuyayniyoqqa yachayniyoq kasqanraykun allin ñanninta purin,mana yuyayniyoqkunatan ichaqa mana yuyayniyoq kayninku pantachin.*+
9 Mana yuyayniyoqkunaqa mana allinta ruwasqankumantan* asikunku,+chanin runakunan ichaqa allipunayta maskhanku.
10 Sapanka runan yachan sonqonpi llakikuyninta,kusikuyninwanpas manan juj runaqa kusikunmanchu.
11 Millay runakunaq wasinqa thunisqan kanqa,+allin runakunaq karpanmi ichaqa t’ikarinqa.
12 Kanmi runaq piensasqanman jina allinman rijch’akuq ñan,+chay ñanmi ichaqa wañuyman apan.+
13 Asikushasqapas sonqoqa nanashanmanmi,kusikuypas llakikuymanmi tukupunman.
14 Mana kasukuq k’ullu runaqa imachus ruwasqanman jinan cosechanqa,+allin runan ichaqa imachus ruwasqanman jina allin kaqkunata chaskinqa.+
15 Mana yachayniyoqqa tukuy uyarisqantan creen,allin yuyayniyoqmi ichaqa allinta tanteakuspa imatapas ruwan.+
16 Yachayniyoqqa allin yuyaywanmi imatapas ruwan, mana allin kaqmantapas karunchakunmi,mana yuyayniyoqmi ichaqa comunta imatapas ruwan, payllapitaqmi confiakunpas.
17 Usqhaylla phiñakuqqa mana yuyayniyoqmi,+allinta imatapas yuyaykuqqa cheqnisqan.
18 Pisi yuyayniyoqkunaqa mana yuyayniyoq kaytan chaskinqaku,allin yuyayniyoqkunaqmi ichaqa imaymana yachay coronanku kanqa.+
19 Mana allin runakunaqa allin runakunamanmi k’umuykunqaku,millay runakunapas chanin runakunaq punkunmanmi k’umuykunqaku.
20 Wajchataqa* wasimasinkunapas cheqnikunkun,+qhapaq runan ichaqa askha amigokunayoq.+
21 Runamasinta pisichaqqa juchallikushanmi,necesitaqkunata khuyapayaqmi ichaqa kusisqa kausan.+
22 ¿Manachu mana allinta yuyaykuqkunaqa pantanqaku?
Allin kaqta ruwanankupaq kallpachakuqkunan ichaqa mana tukukuq munakuyta,* junt’aq kaytawan chaskinqaku.+
23 Jump’ita jich’arispa llank’ayqa allin kaqkunatan apamun,rimaylla rimaymi ichaqa wajcha kayta apamun.+
24 Yachayniyoqkunaq coronanqa qhapaq kayninkun,mana yuyayniyoqkunan ichaqa mana yuyayniyoq kaynillankuwan qhepakunku.+
25 Cheqaq testigoqa jujkunatan salvan,llulla testigon ichaqa sapa rimarispa llullakun.
26 Jehová Diosta manchakuqqa paypin tukuy sonqonwan confian,+wawankunapas pakaykusqan kanqa.+
27 Jehová Diosta manchakuyqa kausay pujyun,wañuy trampakunamantan runata pakaykun.
28 Askha runakunayoq llaqtaqa reytan jatunchan,+mana runakunayoq kamachikuqmi ichaqa chinkapun.
29 Pacienciakuq* runaqa allin reparaqmi,+mana pacienciakuq runan ichaqa mana yuyayniyoq kayninta rikuchin.+
30 Thaj sonqoyoq kayqa cuerpopaqmi jampi,*envidiakuq kaymi ichaqa tulluta ismuchiq onqoy jina.+
31 Pisichikuqta engañaqqa kamaqnintan* k’amishan,+wajcha runata khuyapayaqmi ichaqa jatunchashan.+
32 Millay runataqa mana allin ruwasqallantaqmi urmachinqa,chanin runan ichaqa junt’aq kayninpi pakakunqa.+
33 Allin reparaq runaqa sonqollanpin yachayta waqaychan,+mana yuyayniyoq runan ichaqa yachasqanmanta jatunchakushallan.
34 Chanin kayqa naciontan jatunchan,+juchan ichaqa llaqtata p’enqayman churan.
35 Allin reparaq serviqninwanmi reyqa kusikun,+p’enqayta ruwaqwanmi ichaqa k’araqta phiñakun.+
Uraypi willakuykuna
^ Chaypiqa yaqapaschá “mana yuyayniyoqkunan ichaqa mana yuyayniyoq kayninkuwan jujkunata pantachinku” nillanmantaq.
^ Chaypiqa “mana allin ruwasqankuta allichanankumantan” nillanmantaqmi.
^ Wajchataqa “pobre” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa “Mana usqhaylla phiñakuq” nillanmantaqmi.
^ Chaypiqa “cuerpotan kausachin” nillanmantaqmi.
^ Hebreo rimaypiqa “ruwaqnintan” ninmi.
