Romanos 15:1-33
15 Chhaynaqa noqanchis iñiypi allin kallpayoq kaqkunan iñiypi pisi kallpayoqkunata imachus sasa paykunapaq chaykunapi yanapananchis,+ manataq noqanchispa allinnillanchistachu maskhananchis.+
2 Sapankanchismi runamasinchispa allinninpaq kaqkunata, paykunata kallpachaq kaqkunatawan ruwananchis.+
3 Cristopas manan kikinpa allinnillantachu maskharqan,+ aswanpas Diospa simin qelqapi nisqanman jinan ruwarqan, chaypin nin: “K’amiqniykikunaq k’amikuyninqa noqapin kashan”,+ nispa.
4 Ñaupaqpi qelqasqa kaqkunaqa yachachiwananchispaqmi qelqasqa karqan;+ chaymantapas Diospa simin qelqan kallpachawanchis, aguantananchispaqpas yanapawanchis,+ chaymi suyakuyniyoqpas kanchis.+
5 Kallpachawaqninchis, aguantananchispaqpas yanapawaqninchis Diosmantan mañakuni Cristoq yuyaynin yuyayniyoq kanaykichispaq.
6 Chhaynapi juj nisqalla+ juj kunkalla Señorninchis Jesucristoq Taytan Diosta jatunchanaykichispaq.
7 Chhaynaqa, imaynan Jesucristoqa sumaqta chaskiwarqanchis+ chhaynata qankunapas jujkuna-jujkunawan sumaqta chaskinakuychis,+ chhaynapi Dios jatunchasqa kananpaq.
8 Cristoqa qhari kayninku qaracha kuchusqa kaqkunaq serviqninmanmi tukupurqan,+ chaytan ruwarqan Diosqa cheqaq rimaqpuni kasqanta rikuchinanpaq, ñaupa taytankuman prometesqankunapas cheqaqpuni kasqanta rikuchinanpaqwan,+
9 jinallataq nacionkunapas Diosta khuyapayakuq kasqanmanta jatunchanankupaqwan.+ Diospa simin qelqapas ninmi: “Chayraykun nacionkuna ukhupi adorasayki, sutiykita jatunchaspan tukuy sonqo takisaq”,+ nispa.
10 Chaymantapas ninmi: “Nacionkuna, Diospa llaqtanwan kuska kusikuychis”,+ nispa.
11 Nillantaqmi: “Llapa nacionkuna Jehová* Diosta jatunchaychis, llapa llaqtakunapas payta alabachunku”,+ nispa.
12 Isaiaspas ninmi: “Jesepa mirayninmantan* juj runa rijurimunqa,+ paymi nacionkunata kamachinqa,+ paypin nacionkuna suyakunqaku”,+ nispa.
13 Suyakuyta qoq Diosmantan mañakuni paypi confiasqaykichisrayku ancha kusikuywan thaj kaywan ima junt’aykunasuykichispaq, chhaynapi santo espirituq atiyninwan suyakuyniykichispi aswan kallpachasqa kanaykichispaq.+
14 Wayqellaykuna,* noqaqa allintan yachani qankuna allin kaywan tukuy yachaywan ima junt’a kasqaykichista, yuyaychanakuy yachasqaykichistapas.
15 Ichaqa sut’itan wakin ruwaykunamanta qelqamushaykichis chaykunata yuyarichinaypaq. Chaykunataqa yuyarichimushaykichis Dios ancha sumaq sonqowan qhawariwasqanraykun.
16 Payqa chhaynata qhawariwan Cristo Jesuspa serviqnin kaspa allin willakuykunata llapa nacionkunaman willanaypaqmi,+ chay ruwayqa ch’uya ruwaymi.+ Chaytaqa ruwashani chay nacionkunamanta runakuna santo espirituwan ch’uyanchasqa kaspa sumaq ofrenda jina Diosman jaywasqa kanankupaqmi.
17 Cristo Jesuspa discipulon kasqayrayku Diospa qowasqan llank’anata ruwasqayrayku iman kusisqa kashani.
18 Chaymi noqa kikiypa ruwasqaymantaqa mana rimasaqchu, aswanpas imakunatachus Cristo noqawan ruwarqan waj nacionkuna kasukuq kanankupaq chaykunallamantan rimasaq. Chaytan payqa ruwarqan imachus rimasqaywan, ruwasqaywan,
19 señalkunawan, milagrokunawan,+ Diospa espiritunpa atiyninwan ima; chaymi Jerusalén llaqtamanta qallarispa Ilírico provinciakama Cristomanta allin willakuykunata lliuman willarqani.+
20 Noqaqa tukuy atisqaytan ruwarqani maypichus Cristoq sutinmanta ña uyarinkuña chaykunapi amaña allin willakuykunata willanaypaq, chhaynapi mana jujpa cimentación churasqanman perqanaypaq.
21 Chaytaqa ruwarqani Diospa simin qelqaq nisqanman jinan, chaypin nin: “Paymanta mana jayk’aq willasqa kaqkunan payta reqsinqaku, paymanta mana jayk’aq uyariqkunan entiendenqaku”,+ nispa.
22 Chayraykun askha kutiña qankunaman jamuyta munasharqani chaypas mana atimusharqanichu.
23 Kunanmi ichaqa ña tukuniña kay ladokunapi willayta, chaymantapas unay* watakunamantañan qankunawan tupayta munashani;
24 chaymi España llaqtaman riq jina qankunata watukamuyta munashani, qankunawan juj tiempo sumaqta pasaruqtiytaq maychus rinayman juj chhikanta riysiwanaykichista.
25 Kunanmi ichaqa Jerusalentaraq risaq chaypi iñiqmasikunata* yanapamunaypaq.+
26 Macedonia provinciapi Acaya provinciapi ima iñiqmasikunan kusikuywan juj yanapayta apachishawanku Jerusalenpi kaq wajcha iñiqmasikunapaq.+
27 Kusisqaña chayta ruwashanku chaypas, ruwanankutan paykunaqa ruwashanku chay iñiqmasikunamanta manu kasqankurayku. Paykunaqa Jerusalenpi iñiqkunaraykun Diosmanta imaymanata chaskirqanku, chaymi kaqninkuwan paykunata yanapanankupuni.+
28 Chay apachiwasqankuta paykunaman chayachispaymi Españata risaq, chayman riq jinataq qankunatapas waturikamusaykichis.
29 Qankunamanqa Cristomanta jamuq imaymana allinkuna apaykusqan chayamusaq.
30 Wayqeykuna,* Señor Jesucristorayku espiritumanta jamuq munakuyrayku iman valekuykichis tukuy sonqoykichiswan Diosmanta mañapuwanaykichispaq,+ imaynan noqapas mañakushani jinata;
31 chhaynapi Judeapi kaq mana iñiqkunamanta librasqa kanaypaq,+ Jerusalenpi kaq iñiqkunapas* yanapay apasqayta sumaqta chaskinankupaqwan;+
32 chhaynapitaq Diospa munayninpi qankunaman kusisqa jamuspay qankunawan kuska kallpachasqa kanaypaq.
33 Thaj kayta qoq Dios llapaykichiswan kachun.+ Amén.
Uraypi willakuykuna
^ Qhaway “Astawan yachanapaq A5” nisqata.
^ Griego rimaypiqa “saphinmantan” ninmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Chaypiqa yaqapaschá “qayna” nillanmantaq.
^ Griego rimaypiqa “ch’uya kaqkunata” ninmi.
^ Mayninpiqa warmipaq qharipaqwanmi Bibliapiqa “wayqeykuna” nispa nin.
^ Griego rimaypiqa “ch’uya kaqkunapas” ninmi.
