Romanos 3:1-31
3 Ichaqa, ¿imaynapin judío runapaq allinpuni kanman judío kasqan? ¿Imaynapin qhari kaynin qaracha kuchuchikusqanpas allinninpaq kanman?
2 Imaymanapin. Ñaupaqtaqa paykunamanmi jap’ichisqa karqan Diospa ch’uya willakuyninkuna.+
3 Ichaqa, ¿wakinninku mana iñinkumanchu chayri? ¿Chayraykuchu nisunman: “Diosqa manan confianapaq jinachu”, nispa?
4 Manapunin ¿riki? Llapa runakunaña llulla kankuman chaypas,+ Diosqa cheqaq rimaqpuni+ qanpaqqa kachun; qelqasqa kasqanman jina, “chhaynapin rimasqaykiwan rikuchinki chanin kasqaykita, juzgasqa kaspapas ganankipunin”.+
5 Mana chanin kaqkunata ruwaqtinchistaq runakunaqa reparanku Diosqa chanin kasqanta chayqa, ¿nisunmanchu: “Diosqa manan chanintachu ruwashan chaykunamanta castigawaspanchisqa”, nispa? Chhaynatapaschá wakin runakunaqa ninkuman,
6 ichaqa manan chhaynachu. Diosqa chaninpunin, manachus chanin kanman chayqa, ¿imaynatataq kay pachatari juzganman?+
7 Wakinqa ninkumanpaschá: “Llullakusqaywantaq rikuchiyman Diosqa cheqaq rimaq kasqanta, chayraykutaq payta jatunchankuman chayqa, ¿imaraykutaq Diosri juchasapata jina juzgawanman?”, nispa.
8 Chhayna kaqtinqa “mana allin kaqkunata ruwasun, chhaynapi allin kaqkuna chayamuwananchispaq” nispayá nisun, wakin runakuna chhayna niqmanta yanqa tumpawasqanchisman jina. Chay runakunaqa chanillanpin juchachasqa kanqaku.+
9 Chhaynaqa, ¿jujkunamanta aswan allinchu kanchis noqanchis judiokuna? Manapunin. Nimusqay jina, judío runakunapas griego runakunapas juchasapakunan kanchis.+
10 Qelqapipas ninmi: “Manan pipas chanin ruwaq runaqa kanchu, manapunin ni jujpas kanchu;+
11 manan pipas allin reparaq runaqa kanchu, manan ni jujpas Diosta maskhaq runaqa kanchu.
12 Llapa runakunan mana allin ñanman jaykupunku, llapallankutaqmi mana imapaq valeqman tukupunku; manan pipas sumaq sonqo kanchu, manan ni jujllapas kanchu”.+
13 “Siminkuqa aya p’ampana jinan kicharayashan, qallunkuwan llullakuspan engañanku”.+ “Rimasqankupas mach’aqwaypa venenon jinaraqmi”.+
14 “Siminkupiqa ñakayllan, k’araq phiñakuyllan kashan”.+
15 “Chakinkupas usqhayllan phawarin yawar jich’ariq”.+
16 “Paykunaqa thuniypi runa sufrichiypi imallan purinku,
17 manataqmi yachankuchu thaj kausaytaqa”.+
18 “Paykunaqa manan Diostaqa manchakunkuchu”,+ nispa.
19 Yachasqanchis jina, kamachikuy simiq tukuy imachus nisqanqa chay kamachikuyta llapa kasukuqkunapaqmi kashan, chhaynapi llapanku upallanankupaq, llapa runakunapas Diospa juchachasqan kanankupaqwan.+
20 Chhaynaqa, manan pipas kamachikuy simita junt’asqanraykuchu Diospaqqa chanin kanqa,+ chay kamachikuy simi imachus jucha kasqanta sut’ita reparachiwasqanchisrayku.+
21 Kunanqa sut’in kashan: Diospa ñaupanpi chanin kanapaqqa manan kamachikuy simitaraqchu kasukuna,+ chhayna kananqa ñan willasqaña karqan kamachikuy simipi profetakunaq qelqasqanpipas;+
22 arí, llapa iñiqkunan Jesucristopi iñisqankurayku Diospa ñaupanpi chaninpaq qhawarisqa kanqaku. Paypaqqa llapa runapas igual-llan kanku.+
23 Llapa runakunan juchallikuq kanku, chaymi mana atinkumanchu Dios jina ch’uya kaytaqa.+
24 Diosqa runakunata chaninpaq qhawarin juchamanta kacharichisqa kanankupaq Cristo Jesús juj preciota pagasqanraykun,+ chay regaloqa karqan Diospa ancha sumaq sonqo kayninpin.+
25 Paytan Diosqa allipunachiy ofrendata jina kachamurqan,+ chhaynapi runakuna paypa yawarninpi iñispa Dioswan allipunakapunankupaq.+ Diosqa chayta ruwarqan ñaupa tiempopi juchakunata perdonaspa pacienciakuspa ima chanin kasqanta rikuchinanpaqmi.
26 Chaymantapas payqa chayta ruwarqan kay tiempopipas chanin kasqanta rikuchinanpaqmi;+ chhaynapi chaninlla kashananpaq, Cristopi* iñiq runakunatapas chaninta qhawarinanpaqwan.+
27 Chhaynaqa, ¿kanchu imallapas alabakunanchispaq? Manan kanchu. ¿Ima kamachikuytaq jark’awanchis alabakunanchismantari? ¿Imaymanakuna ruwananchista munaq kamachikuychu?+ Manan. Aswanpas iñiyniyoq kananchista munaq kamachikuymi.
28 Yachasqanchis jina, juj runaqa iñisqanraykun chaninpaq jap’isqa kanqa, manan kamachikuy simiq nisqanta ruwasqanraykuchu.+
29 ¿Icha Diosqa judiokunaq Diosnillanchu?+ ¿Manachu payqa waj nacionkunamanta runakunaqpas Diosnillantaq?+ Arí, payqa waj nacionkunamanta runakunaqpas Diosnillantaqmi.+
30 Pay sapallantaq Dios chayqa,+ payqa qhari kaynin qaracha kuchusqakunatapas mana kuchusqakunatapas iñisqankuraykun chaninpaq jap’inqa.+
31 Chhaynaqa, ¿mana valeqmanchu kamachikuy simita iñisqanchiswan tukuchipushanchis? ¡Manapunin! Aswanmi kamachikuy simitaqa allinta sayachishanchis.+
