Rut 2:1-23
2 Noemipa qosan Elimelecpa familianmantan juj runa karqan Boaz+ sutiyoq. Payqa qhapaqllañan karqan.
2 Moab llaqtayoq Rutmi Noemita nirqan: “¿Manachu chajra-chajrata riruyman? Icha pillapas dejawanman qhepanta rispa cebada ususqata pallapakunayta”,*+ nispa. Jinan Noemiqa nirqan: “Rillay ususíy”, nispa.
3 Chaymi Rutqa chajra-chajraman rispa rutuqkunaq qhepanpi pallapakuyta qallarirqan. Payqa mana yachaspallan Elimelecpa+ familian Boazpa+ chajranman chayarqan.
4 Chay ratun Boazqa Belenmanta chayamuspa rutuqkunata napaykurqan: “Jehová Dios qankunawan kachun”, nispa. Paykunataq nirqanku: “Jehová Diosmi bendecisunki”, nispa.
5 Chaymantataq Boazqa rutuqkunamanta encargakuqta nirqan: “¿Piqpa familiantaq jaqay sipasri?”, nispa.
6 Jinan encargakuqqa nirqan: “Chay sipasqa Moab llaqtamantan,+ payqa Noemiwan kuskan Moab llaqtamanta jampusqa.+
7 Paymi niwan: Valekusayki, ¿manachu rutuqniykikunaq usuchisqanta pallaparukuyman?,+ nispa. Tutamantan jamusqanmantapachan mana samaspa llank’ashan, kunachallanmi ch’ujllapi tiyayrun juj chhikanta samarinanpaq”, nispa.
8 Chaymantataq Boazqa Rut-ta nirqan: “Ususíy, aman jujpa chajranmanqa rinkichu, amapunin maymanpas rinkichu, kayllapi warmi llank’aqniykunaq kasqanpi pallapakunki.+
9 Allinta qhawanki maypichus llank’ashanku chayta, chayman rinaykipaq. Ñan wayna llank’aqniykunatapas kamachiniña ama imatapas ruwanasuykikupaq. Ch’akichikunki chaypas, p’uyñukunaq kasqanman rispa waynakunaq apamusqan unuta tomakunki”, nispa.
10 Chayta niqtinmi Rutqa qonqorikuspa pampakama k’umuykurqan, jinaspa nirqan: “Wiraqocháy, ¿imaraykutaq khuyapayaykuwankiri? Waj llaqtayoqña kashaqtiypas,+ ¿imaraykutaq sumaqtari qhawariwanki?”, nispa.
11 Chaymi Boazqa nirqan: “Runakunan allinta willawanku qosaykiq wañupusqanmantapacha suegraykipaq imaymana ruwapusqaykita. Chaymantapas willawankun papaykita, mamaykita, llaqtaykita ima saqespa kay mana reqsisqayki llaqtaman jamusqaykitapas.+
12 Chay ruwasqaykimantaqa Jehová Diosmi kutichipusunki.+ Israelpa Diosnin Jehová Diosmi jatun premiota* qopusunki paypa rafran ukhupi pakakusqaykimanta”,+ nispa.
13 Jinan Rutqa nirqan: “Gracias wiraqocháy yanapaykuwasqaykimanta, sumaqta rimasqaykiwanmi kallpacharuwanki, sonqoytapas thaj niykachinki. Manamá noqaqa jujnin kamachillaykipaschu kani”, nispa.
14 Mijuna horastan Boazqa Rut-ta nirqan: “Jamuy ususíy, t’antata vinagreman challpuykuspa mijuykuy”, nispa. Chaymi payqa rutuqkunaq ladonpi tiyaykurqan, jinan Boazqa cebada jank’ata jaywarirqan, paytaq sajsanankama mijurqan, mijunanqa puchurqanraqmi kanpas.
15 Llank’ananpaq Rut sayariqtintaq+ Boazqa llank’aqninkunata kamachirqan: “Aman imaninkichispaschu, jinalla rutusqa ukhupipas pallapakuchun.+
16 Chaymantapas, rutushaspaykichis makiykichismanta juj chhikanta pampaman urmachinkichis pallakunanpaq, amataq imaninkichispaschu”, nispa.
17 Chhaynapin payqa ch’isiyaqta pallapakurqan,+ cebada pallapakusqanta q’asuruspataq* arroba masta* oqarirqan.
18 Chayta aparikuspataq llaqtaman kutipurqan, jinaspa suegranman rikuchirqan. Qoykullarqantaqmi alsakamusqan* cebada jank’atapas.+
19 Chaymi suegranqa Rut-ta nirqan: “¿Maypitaq pallapakamurqankiri? ¿Piqpa chajranpin llank’amurqanki? Dios kutichipuchun chay sumaq sonqo runaman”,+ nispa. Jinan payqa willarqan: “Boaz sutiyoq wiraqochaq chajranpin pallapakamurqani”, nispa.
20 Jinan Noemiqa nirqan: “Jehová Dios paypaq askha bendicionta churapuchun. Diosqa kausaqkunamanpas wañusqakunamanpas mana tukukuq munakuynintan* rikuchin”,+ nispa. Noemiqa nillarqantaqmi: “Chay runaqa familianchismi,+ payqa librawananchispaq parientenchiskunamanta*+ jujninmi”, nispa.
21 Jinan Moab llaqtayoq Rutqa nirqan: “Payqa niwallarqantaqmi: Llank’aqniykunaq kasqallanpi kanki llapan cosechayta oqarinankukama,+ nispa”.
22 Chaymi Noemiqa qhachuninta nirqan: “Arí ususíy, allinmi kanqa warmi llank’aqninkunaq kasqallanpi kanki chayqa. Jujpa chajranpiqa imatapas nisunkikuman”, nispa.
23 Chaymi Rutqa Boazpa warmi llank’aqninkunaq kasqallanpi pallapakurqan, cebada cosechaypas+ trigo cosechaypas tukukunankama. Payqa suegranwan kuskallapunin tiyarqan.+
Uraypi willakuykuna
^ Pallapaytaqa “qhellapay” nillankutaqmi. Qhaway Explicasqa simikuna nisqapi “Pallapakuy” nisqata.
^ Hebreo rimaypiqa “junt’asqa pagota” ninmi.
^ Q’asuytaqa “waqtay, k’upay” nillankutaqmi.
^ Hebreo rimaypiqa “yaqa juj efata” ninmi. Juj efá cebadaqa yaqa chunka kinsayoq kilotan pesaq. Efá tupunamanqa iskay chunka iskayniyoq litron jaykuq. Qhaway “Astawan yachanapaq B14” nisqata.
^ Alsakuytaqa “puchukuy” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Qhaway Explicasqa simikuna nisqapi “Libraq pariente” nisqata.
