Rut 3:1-18
3 Noemiqa qhachunin Rut-tan nirqan: “Ususíy, ¿manachu casarachipuykiman,+ chhaynapi allillan kanaykipaq?
2 Pikunawanchus llank’amusharqanki chay warmikunaq patronnin Boazqa parientenchismi.+ Payqa kay ch’isintan era patapi* cebadanta wayrachinqa.
3 Chhaynaqa phaway maqchirakamuspa sumaq q’apaq aceitewan jawirakamuy. Jinaspa sumaqta p’acharukuspa era patata jaykunki, ichaqa Boazwanqa aman rikuchikunkichu mijuyta ujayta tukunankama.
4 Puñuq ripuqtintaq makilla qhawanki maypichus puñunqa chayta. Chaymantataq chayman rinki, jinaspa chakinta q’alarispa jayt’anman suchuykunki. Payñan nisunki imachus ruwanaykita”, nispa.
5 Jinan Rutqa nirqan: “Tukuy niwasqaykiman jinan ruwamusaq”, nispa.
6 Chaymi payqa era pataman jaykuspa suegranpa nisqanman jina lliuta ruwarqan.
7 Boazqa mijuykuspa ujaykuspa iman kusisqa kasharqan, chaymantataq cebada montón k’uchupi puñuykurqan. Jinan Rutqa mana reparachikuspalla qayllaykurqan, jinaspa chakinta q’alarispa jayt’anman suchuykurqan.
8 Kuska tutatataq Boazqa khatatatayta* qallarirqan, chaymi tiyarirqan, jinaspa rikurqan jayt’anpi juj warmita kumparayashaqta.
9 Chaymi nirqan: “¿Pin kanki?”, nispa. Paytaq kutichirqan: “Noqa kamachiyki Rutmi kani. Qanqa libraq parienteykun*+ kanki, chayrayku valekuyki noqa kamachiykita yanapaykuwanaykipaq”,* nispa.
10 Chaymi payqa nirqan: “Jehová Diosmi bendecisunki ususíy. Ñaupaqpi suegraykipaq ruwasqaykiwanmi mana tukukuq munakuyniykita* rikuchirqanki, kunanmi ichaqa astawanraq chay munakuyniykita rikuchishanki.+ Qanqa manan wayna runatachu maskhakurqanki, qhapaqña wajchaña* kaqtinpas.
11 Ususíy, ama manchakuychu, tukuy niwasqaykitan ruwasaq,+ llaqtapiqa lliu runan yachan ancha allin warmi kasqaykita.
12 Ichaqa libraq parienteykichisña+ kani chaypas, kanraqmi aswan qaylla parienteykichisqa.+
13 Kayllapi qhepakuy kay tutata. Sichus tutamantanta chay parienteyki obligacionninwan junt’ayta munanqa chayqa, allinmi kanqa.+ Mana chayqa wiñaypaq kausaq Jehová Diospa sutinpin jurayki noqa kikiy chay obligacionwan junt’anaypaq. Chayrayku paqarimunankama kayllapiraq qhepakuy”, nispa.
14 Chaymi Rutqa paqarimunankama chaki jayt’allanpi kasharqan, ichaqa arpha-arphallataraqmi jatarirqan runakuna mana reqsinankupaq. Boazqa nirqanmi: “Ama pipas yachachunchu era pataman juj warmi jamusqanta”, nispa.
15 Nillarqantaqmi: “Mantonniykita mast’arispa jap’imuy”, nispa. Chaymanmi Boazqa iskay arroba más* cebadata jich’aykurqan, oqarispataq Rutman qorqan aparikunanpaq. Chaymantataq Boazqa llaqtata rirqan.
16 Rutqa suegranpa wasinmanmi kutipurqan, suegrantaq tapurqan: “¿Imaynan kamurqanki* ususíy?”, nispa. Jinan Rutqa willarqan Boaz paypaq imaymana ruwasqanta.
17 Chaymantapas nillarqantaqmi: “Kay iskay arroba más cebadatan qoykamuwan: Ama mana imayoqqa suegraykiq wasinman chayaychu, nispa”.
18 Jinan Noemiqa nirqan: “Kunanqa ususíy, suyakullay imaynachus kay asunto kanqa chayta yachanaykipaq, payqa manan jinallachu kanqa kay asunto allichakunankama”, nispa.
Uraypi willakuykuna
^ Era patataqa “wayrachina pata” nillankutaqmi.
^ Khatatataytaqa “kharkatiy” nillankutaqmi.
^ Qhaway Explicasqa simikuna nisqapi “Libraq pariente” nisqata.
^ Chaypiqa “p’achaykita noqa kamachiykiman mast’arimuwanaykipaq” nillanmantaqmi.
^ Wajchataqa “pobre” nillankutaqmi.
^ Qhaway Explicasqa simikuna nisqapi “Mana tukukuq munakuy” nisqata.
^ Chaypiqa yaqapaschá “soqta sea” nillanmantaq. Soqta sea cebadaqa yaqa iskay chunka pisqayoq kilotan pesaq. Juj sea tupunamanqa qanchis litro masmi jaykuq (7,33 L). Qhaway “Astawan yachanapaq B14” nisqata.
^ Hebreo rimaypiqa “Pin kanki” ninmi.
