Salmos 102:1-28
Pisichasqa runaq sinchi llakikuypi tarikuspa mañakusqan, Jehová Diosman llakikuyninkunata mast’arisqan.+
102 Diosníy Jehová, mañakusqayta uyarimuway,+auxilio mañakusqayta, wajakusqayta uyarimuway.+
2 Amayá llakikusqay tiempopiqa wasaykitachu kutirichimuway.+
Ninriykita noqaman asuykachimuway,usqhaylla wajakusqayta uyarimuway.+
3 P’unchayniykunaqa q’osñi jinallan chinkaripushan,tulluykunapas ninaq ruphasqan jinan kashan.+
4 Sonqoypas may ñit’isqan kashan,naq’esqa qora jinan kashan, ch’akisqan kashan,+manañan mijunayawanpasñachu.
5 Llakikuyniyqa nishun, jik’ipakusparaqmi waqashani,+aychaypas manan kanñachu, sinchi tullullañan kashani.+
6 Ch’in ladopi pelícano jinan kashani,thunisqa wasikunapi tiyaq juku* jinan kashani.
7 Manan puñuypas jap’iwanchu,wasi patapi tiyaq sapan purikuq urpi jinan kani.+
8 Enemigoykunapas p’unchay ch’isiyaqmi k’amiwanku.+
Asipayawaqkunapas sutiyta oqarispan jujkunata ñakanku.
9 T’antayqa usphan kapun,+ujanaypas weqewan chhaqrusqan kashan.+
10 K’araq phiñakuyniykiraykun, coleraykiraykun chhayna kashani,qanqa wijch’uwanallaykipaqmi oqariwarqanki.
11 P’unchayniykunaqa llanthu jinan chinkaripushan.+
Qora jinan, planta jinan naq’epushani.+
12 Qanmi ichaqa Diosníy Jehová wiñaypaq kanki.+
May jatun kasqaykitapas* llapa miray runakunan yachanqaku.+
13 Qanqa jatarinkin, jinaspa Sionta khuyapayanki;+ñan khuyapayanayki tiempo chayamunña,+ñan chaypaq churasqayki tiempo kaypiña.+
14 Kamachiykikunaqa maytan ruminkunata munakunku,+ñut’u jallp’ankunatapas maytan munakunku.+
15 Llapa nacionkunan Jehová Diospa sutinta manchakunqaku,kay pachapi llapa reykunan jatun kayninta manchakunqaku.+
16 Jehová Diosmi Siontaqa wajmanta sayarichinqa;+may atiyniyoqchus, may jatunchus kasqantan rikuchinqa.+
17 Wajchakunaq mañakusqantan tukuy yuyaywan uyarinqa;+paykunaq mañakusqantaqa manan pisipaqchu qhawarinqa.+
18 Kaykunaqa qhepa wiñay runakunapaqmi qelqasqa kashan,+chayraq paqarimuq llaqtakuna Jehová* Diosta jatunchananpaqmi ruwasqa kashan.
19 Jehová Diosqa janaq pachamantan kay pachata qhawamushan,wichaypi ch’uya tiyananmantan kay jallp’ata qhawamushan.+
20 Presokunaq khuyay llakikusqantan qhawamushan;+wañuypaq juchachasqakunata librananpaqmi qhawamushan.+
21 Chhaynapi Jehová Diospa sutinqa Sionpi jatunchasqa kananpaq,+Jerusalenpipas alabasqa kananpaq.
22 Llaqtakunan, suyukunan payta jatunchanankupaq juñukunqaku,Jehová Diosta servinankupaqmi juñukunqaku.+
23 Paymi manaraq tiempopi kallpayta qechuwarqan,paymi p’unchayniykunatapas pisiyachirqan.
24 Noqan nirqani: “Diosníy, amayá kuskan vidaypiqa wañuchiwaychu,wiñay-wiñaypaq kausaq Dios, amayá chaytaqa ruwawaychu.+
25 Qanqa unayñan kay pachaq cimentacionninta churarqanki,llapa cielokunapas qanpa makiykiq ruwasqanmi.+
26 Chaykunaña chinkapunman chaypas qanqa manan chinkankichu.
Chaykunaqa p’acha jinan thantakapunqa,qantaq p’achata jina chaykunata cambianki,chhaynapin llapa chaykunaqa chinkapunqa.
27 Qanmi ichaqa kaqllapuni kanki;kausasqayki watakunapas mana tukukuqmi.+
28 Kamachiykikunaq wawankunaqa thajpin tiyanqaku,llapa miraynin runakunan ñaupaykipi allin tajyachisqa kanqaku”,+ nispa.
Uraypi willakuykuna
^ Jukutaqa “tuku” nillankutaqmi.
^ Chaypiqa “sutiykitapas” nillanmantaqmi.
^ Hebreo rimaypiqa “Jah” ninmi. Jah nisqaqa pisi letrakunallapin “Jehová” ninanta nishan.
