Salmos 25:1-22
Davidpa takin.
א [álef]*
25 Diosníy Jehová, qanmanmi jamuyki.
ב [bet]
2 Diosnilláy, qanpin noqaqa confiani.+
Amayá munaychu p’enqaypi tarikunaytaqa,+amayá munaychu cheqniwaq runakuna llakikuyniywan kusikunankutaqa.+
ג [guímel]
3 Qanpi jap’ipakuqqa manan jayk’aqpas p’enqaypiqa tarikunqachu.+
Yuyaypi traicionaq runan ichaqa p’enqaypi tarikunqa.+
ד [dálet]
4 Diosníy Jehová, ñanniykikunata reqsichiway,+ñanniykita imayna purinayta yachachiway.+
ה [he]
5 Cheqaq simiykiman jina kausachiway, chayta yachachiway.+
Qanqa salvaqniy, qespichiqniy Diosmi kanki.
ו [waw]
P’unchay-p’unchaymi noqaqa qanllapi suyakuni.
ז [zayin]
6 Diosnilláy Jehová, yuyariy khuyapayakuq Dios kasqaykita;qanqa sapa kutillanmi+ llaqtaykiman mana tukukuq munakuyniykita rikuchirqanki.+
ח [jet]
7 Amaña yuyariychu wayna kaspa juchallikusqayta, mana allin ruwasqaytapas.
Jehová Diosníy, mana tukukuq munakuyniykipi,+ khuyapayakuq kayniykipi yuyariway.+
ט [tet]
8 Jehová Diosqa sumaq sonqo Diosmi, chanin Diosmi,+chaymi juchasapa runakunata yachachin maynintachus purinankuta.+
י [yod]
9 Payqa allin kaq ruwaymanmi sumaq sonqo runakunata pusanqa,+ñanninkunatan llamp’u sonqo runakunaman reqsichinqa.+
כ [kaf]
10 Jehová Diospa ñanninkunaqa munakuymi, cheqaqmi.
Mana tukukuq munakuytan rikuchin rimanakusqanta junt’aqmanqa,+manan jayk’aqpas saqenchu yuyarichiyninkunata kasukuqtaqa.+
ל [lámed]
11 Diosníy Jehová, sutiykirayku juchayta pampachaway,+may jatunña juchay kanman chaypas perdonaykuway.
מ [mem]
12 ¿Kanchu pipas Jehová Diosta manchakuq runa?+
Paymanmi Diosqa mayqen ñantachus purinanta reqsichinqa.+
נ [nun]
13 Payqa allin kaqkunawanmi kusikunqa,+miraynin runakunan kay pachataqa herenciata jina chaskinqaku.+
ס [sámekh]
14 Jehová Diosta manchakuqkunallan paywanqa allin amigontin kanqaku,+paytaq rimanakusqan simikunata paykunaman reqsichinqa.+
ע [ayin]
15 Ñawiykunaqa Jehová Diosllatan qhawashan,+paymi chakiykunata trampamanta kacharichinqa.+
פ [pe]
16 Qhawarimuway, khuyapayaykuway,sapallaymi kashani, manan yanapaqniy kanchu.
צ [sadé]
17 Sonqoypi llakikuyniykunaqa askhayapunmi;+Diosníy, llakikuyniymanta orqoway.
ר [resh]
18 Qhawariy khayna sufrisqayta, qhawariy llakikuyniyta,+Diosníy, juchaykunata pampachaykuway.+
19 Qhawariy, khaytukuymi enemigoykuna kapun,sinchitan paykunaqa cheqnikuwanku.
ש [shin]
20 Vidayta waqaychay, paykunamanta libraway.+
Amayá munaychu p’enqaypi tarikunaytaqa,noqaqa qanllamanmi jap’ipakamuyki.
ת [taw]
21 Chaninta ruwasqay, allinta kausasqay waqaychawachun,+noqaqa qanllapin suyakuni, qanllapin confiani.+
22 Diosnilláy, Israelta llapa ñak’ariyninmanta libray.
Uraypi willakuykuna
^ Kaypi takikunaqa hebreo rimaypi abecedarioman jinan armasqa kashan.
