Salmos 33:1-22
33 Chanin runakuna, Jehová Diosrayku kusikuymanta qapariychis.+
Ch’uya sonqo runakunaqa jatunchanankupunin.
2 Jehová Diospaq arpata tocapuychis, payman graciasta qoychis.
Chunka cuerdayoq tocanakunawan paypaq tocapuychis,jatunchay takikunata takipuychis.
3 Mosoq takita paypaq takipuychis,+cuerdayoq tocanakunata tukuy sonqo tocapuychis,kusisqa paypaq takipuychis.
4 Jehová Diospa siminqa chaninmi,+llapa ima ruwasqanpas confianapaq jinan.
5 Payqa allin kaqta, chanin kaqtawanmi munakun.+
Kay pachaqa Jehová Diospa mana tukukuq munakuyninwanmi junt’a kashan.+
6 Jehová Diospa siminwanmi cieloqa kamasqa karqan,+paypa espiritunwanmi* chaypi tukuy ima kaqpas* ruwasqa karqan.
7 Paymi lamar-qocha unutapas juj jawallaman juñun,+paymi aytikachakuq unutapas allinta waqaychan.
8 Llapa jallp’a pacha Jehová Diosta manchakuchun,+kay pachapi llapa kausaqkuna payta jatunchachun.
9 Paypa rimarisqanwanmi tukuy imapas ruwakurqan,+paypa kamachisqanmi tukuy imapas qaqata sayarqan.+
10 Jehová Diosmi nacionkunaq mana allin yuyaykusqanta qolluchirqan,+paymi llaqtakunaq piensasqanta mana valeqman tukuchirqan.+
11 Jehová Diospa munayninmi* ichaqa wiñaypaq kanqa,+sonqonpa yuyaykusqankunapas watan-watanmi kaqlla kanqa.
12 ¡May kusisqan Jehová Diosta Diosninpaq jap’iq nacionqa!+
¡May kusisqan herencianpaq ajllakusqan llaqtaqa!+
13 Jehová Diosqa janaq pachamantan qhawamushan,runakunaq llapa churinkunatan qhawamushan.+
14 Maypichus tiyasqanmantan kay pachapi runakunata qhawamushan.
15 Paymi llapa runakunaq sonqon kamaqqa.
Payqa runakunaq tukuy ruwasqantan qhawamushan.+
16 Juj reytaqa manan askha soldadokunayoq kasqanchu libranqa,+kallpasapa maqanakuqtapas manan kallpanchu libranqa.+
17 Caballoq atipananpi confiayqa yanqan kanman,+manan kallpasapa kasqanraykuchu “librawanqan” niwaq.
18 ¡Uyariwaychis! Jehová Diospa ñawinqa manchakuqninkunapin kashan,+paypa ñawinqa mana tukukuq munakuyninta suyakuqkunapin kashan.
19 Wañuymanta librananpaqmi qhawashan,yarqay tiempopi kausachishanallanpaqmi qhawashan.+
20 Noqaykuqa Jehová Diospin suyakushayku.
Paymi yanapaqniykuqa, paymi jark’aykuwaqniyku escudoqa.+
21 Paymi sonqoykuta kusichiqqa;paypa sutinpin noqaykuqa jap’ipakuyku.+
22 Diosniyku Jehová, mana tukukuq munakuyniykiqa noqallaykupi kashachun,+qanta suyakunaykukama noqallaykupi kashachun.+
Uraypi willakuykuna
^ Hebreo rimaypiqa “llapa ejercitonpas” ninmi.
^ Chaypiqa “yuyaychayninmi” nillanmantaqmi.
