Salmos 36:1-12
Takiqkunata pusariqpaq. Jehová Diospa kamachin Davidpa takin.
36 Millay runataqa juchan sonqon ukhumanta rimapayamun,manan Diostaqa manchakunchu.+
2 Payqa may allinpaqmi, may chaninpaqmi qhawarikun,manan pantasqankunataqa reparanchu ni cheqnikunpaschu.+
3 Siminkunaqa k’irikuqllan, engañaqllan.
Payqa manan allin kaqtapas reparanchu.
4 Puñunanpipas mana allinkunallatan yuyaykun.
Mana allin ñanmanmi k’askakun,manan munanchu mana allin kaqmanta t’aqakuytaqa.
5 Jehová Diosníy, mana tukukuq munakuyniykiqa cielokamaraqmi chayan,+junt’aq kasqaykipas phuyukunakamaraqmi chayan.
6 Chanin kasqaykiqa jatun orqokuna jinan,+chaninchayniykikunapas jatun qochapi unu ukhukuna jinan.+
Diosníy Jehová, qanmi kausachinki runakunatapas animalkunatapas.+
7 Diosnilláy, ¡may allinpunin mana tukukuq munakuyniykiqa!+
Rafraykiq llanthunpin runakunaq churinkunaqa pakakun.+
8 Wasiykipi allin kaqkunatan sajsanankukama mijunku,+sumaq kaqkunatan paykunaman mijuchinki.+
9 Qanmantan kausayqa paqarimun,+qanpa k’anchayniykiwanmi k’anchayta rikuyku.+
10 Reqsiqniykikunaman mana tukukuq munakuyniykita rikuchishallay,+ch’uya sonqokunamanpas chanin kaqta rikuchishallay.+
11 Ama millay runaq chakinqa saruwachunchu,ama mana allin runaq makinpas qarqowachunchu.
12 Qhawariychis, mana allin ruwaqkunaqa urmasqan kashanku,millay runakunaqa wijch’u-wijch’un kashanku, manan sayariytapas atinkuchu.+
