Tito 2:1-15
2 Qanqa allin yachachikuyman jinallapuni rimashay.+
2 Kuraq runakunaqa imatapas allin yuyaywan ruwaqkunan kananku, respetanapaq jinataqmi kausanankupas, chaymantapas allin yuyayniyoq, allin iñiq, tukuy sonqo munakuq, tukuy ima aguantaq iman kananku.
3 Kuraq warmikunapas Dios sonqo warmikuna jinapunin kausananku, manan yanqa tumpaqkunachu kananku, manataqmi askha vinomanchu yachasqa kananku,* aswanmi allin kaqkunata yachachiq kananku.
4 Chhaynapin sipas warmikunata yachachinqaku qosanku munakuyta, wawanku munakuyta,
5 allin yuyayniyoq kayta, ch’uya kausayta, wasipi ruwanankuwan allin junt’ayta, sumaq sonqo kayta, qosanku kasukuq kaytawan,+ chhaynapin Diospa siminmanta mana pipas millaytachu rimanqa.
6 Waynakunatapas kallpachay allin yuyayniyoq kanankupaq,+
7 ichaqa qan kikiyki allin ejemplo kay tukuy imatapas allinta ruwaspa. Imachus ch’uya kaqta allin yuyaywan yachachiy,+
8 chaypaqqa mana juchachana allin simikunawanmi yachachinayki,+ chhaynapi contranchispi kaqkunaqa noqanchismanta mana imatapas niyta atispanku p’enqarikunankupaq.+
9 Kamachikunapas tukuy imapi patronninkuta kasukuchunku,+ tukuy atisqankuta ruwachunku paykunata kusichinankupaq, ama kutipakuqchu kachunku,
10 amataq imankutapas suwakuchunkuchu,+ aswanpas confianapaq jinapuni kachunku, chhaynapin salvawaqninchis Diospa yachachikuyninta tukuy ima ruwasqankuwan sumaqchanqaku.+
11 Diosmi ancha sumaq sonqo kayninta rikuchirqan imaymana clase runakunapaq salvacionta apamuspa.+
12 Chay ancha sumaq sonqo kaymi yachachiwanchis Diosta mana manchakuq kayta cheqnikunanchispaq, kay pachaq millay munapayayninkunatapas cheqnikunanchispaq;+ yachachiwallanchistaqmi kay tiempopi* allin yuyaywan, chaninta, Dios sonqo jina kausananchispaqpas.+
13 Chhaynatan kausashananchis sumaq suyakuyninchis junt’akunanta suyashananchiskama,+ jinallataq tukuy atiyniyoq Dios lliflli kaywan rijurimunankama, salvawaqninchis Jesucristopas lliflli kaywan rijurimunankama.
14 Paymi entregakurqan tukuy imaymana millay ruwaykunamanta* librasqa* kananchispaq,+ allin ruwaykunata tukuy sonqowan ruwaq llaqtata payllapaq ch’uyanchananpaqwan.+
15 Tukuy atiywan chaykunamantaqa rimashallaypuni, jujkunatapas kallpachay anyay ima.+ Amapunin piwanpas pisichachikunkichu.
Uraypi willakuykuna
^ Chaypiqa “manan askha vinoq kamachinchu kananku” nillanmantaqmi.
^ Qhaway Explicasqa simikuna nisqapi “Tiempo, pacha” nisqata.
^ Chaypiqa “kamachikuy contra ruwaykunamanta” nillanmantaqmi.
^ Griego rimaypiqa “kacharichisqa” ninmi.
