Bibliaqa llapa runakunapaq Diospa qelqachisqan simikunan. Qelqachiqnin Diosta reqsinanchispaqqa Bibliatan estudiananchis (Juan 17:3; 2 Timoteo 3:16). Chaypin Jehová Diosqa willan runakunapaq, tiyasqanchis jallp’apaqpas imatachus munan chayta (Génesis 3:15; Apocalipsis 21:3, 4).

Manan mayqen libropas Biblia jinaqa runakunata yanapanmanchu. Biblian yanapawanchis Jehová Dios jina munakuq, khuyapayakuq, llakipayakuq ima kananchispaq. Jinaspapas suyakuytan runakunaman qon, chhaynapi sinchi ñak’ariykunatapas aguantanankupaq. Chaymantapas kay pachapi mana Diospa munayninman jinachu kaqkunatan sut’iman orqon (Salmos 119:105; Hebreos 4:12; 1 Juan 2:15-17).

Bibliaqa hebreo, arameo, griego simikunapin qelqakurqan, kunankamaqa kinsa waranqa más simikunamanñan t’ijrakun junt’asqa otaq wakillanpas. Manan Biblia jinaqa mayqen libropas t’ijrakurqanchu nitaq rakikurqanpaschu. Chayqa manan admirakunapaqchu, Biblia imamantachus astawan willasqanmantan juj profecía nin: “Diospa gobiernonmanta allin willakuykunan pachantinpi willasqa kanqa llapa nacionkuna yachananpaq, jinan tukukuyqa chayamunqa”, nispa (Mateo 24:14).

Bibliaq yachachisqan ancha allinpuni kasqanta yachasqaykuraykun, anchata respetasqaykuraykun kallpachakurqayku qallariypi qelqakusqanman jina kaqllata entiendekuq Bibliata t’ijranaykupaq. Chaymantapas kallpachakurqaykun sut’ita entiendekuq, fácil leey Biblia kananpaq. Astawan yachanapaq nisqa partepi “¿Imaynatan Bibliata t’ijrakunan?”, “¿Imayna t’ijrasqan kay Biblia kashan?”, “¿Imaynatan Biblia kay tiemponchiskama chayamurqan?” nisqa yachachikuykunan willashan imayna ruwasqachus kay Biblia kashan chayta.

Jehová Diosta munakuqkunaqa, payta adoraqkunaqa allin t’ijrasqa Bibliatan munanku, Diospa palabran k’apajta, facil-llata entiendekunantan munanku (1 Timoteo 2:4). Chayraykun kay Mosoq Pacha Biblia nisqa Bibliata quechua simipi ruwamurqayku, munaykun askha simikunaman t’ijrakunanta. Diosta maskhaq munasqa runamasiy, mañakuykun Diosta tarinaykipaq kay Biblia yanapanasuykipaq (Hechos 17:27).