2022 watapiqa imaymana mana allinkunan pasarqan. Guerrakunan qallarirqan, qolqepas llank’anakunapas pisiyapurqanmi, kay mundopas astawanmi cambiashan. ¿Maypin imaraykuchus chaykuna pasashan chayta willawasunman? Bibliallapin, chaytan kunan juj chhikanta qhawarisun.

¿Imatan rikuchin 2022 watapi imakunachus pasasqan?

 Kay último watapi llapa imachus pasasqanmi sut’ita rikuchin imaynas “tukukuy p’unchaykunapiña” tiyashanchis chayta (2 Timoteo 3:1). Chay p’unchaykunaqa 1914 watapin qallarirqan. Tukuy imachus pasasqanqa Bibliaq willasqanman jinapunin kashan, llapa willasqanmi allintapuni junt’akushan.

 “Guerrakuna” (Mateo 24:6).

•   “2022 watapin yapamanta Europa ladopi guerra qallarirqan”. a

 “Yarqay” (Mateo 24:7).

•   “2022 watapin mana jayk’aq jinaraq lliupi yarqay yapakurqan”. b

 “Mast’arikuq millay onqoykuna” (Lucas 21:11).

•   “Polio onqoypas jujmantan rijurimushan, viruela del mono onqoypas astawanñan mast’arikushan, coronavirus onqoypas kaqllan runakunata wañuchishan. Kaykunan rikuchin imaynas chay onqoykunaqa may peligroso chayta, imaynas runakunaqa chaykunaq ñaupanpiqa mana imapaschu kanchis chayta”. c

 “Mancharikunapaq jina kaqkuna” (Lucas 21:11).

•   “2022 watapi ch’akiriy tiempotaqa sinchi ruphay tiempota jinachá yuyarikunqa. Chay tiempopiqa sinchitan ruphaykurqan, lliupin unu pisiyarqan, askha nacionkunapin campokunatapas sach’akunatapas lliuta nina rupharqan, askha partekunapin lloqllakunapas llaqtakunata apapurqan. Llapa chaykunawanmi kay mundopi nishu ñak’ariy kashan, waranqa-waranqanpin runakunapas wañurqanku, askha waranqa runakunan juj ladokunamanpas astakurqanku”. d

 “Ch’aqwaykuna” (Lucas 21:9).

•   “Lliupin runakuna sinchi colerasqa kashanku; manan llank’ana kashanchu imaymanataqmi nishuta valeshan. Chaykunaraykun runakunaqa gobiernokuna contra jatarishanku, kay 2022 watapin chayqa astawanraq pasarqan”. e

¿Jamuq watari imaynataq kanqa?

 Manan pipas yachanmanchu imapunichus 2023 watapi pasanqa chaytaqa. Ichaqa manan kayta qonqananchischu: Ñan chayamushanña Diospa gobiernon, chay gobiernopiqa may munaymi kay pachaqa kapunqa (Daniel 2:44). Chay gobiernon llapa mana allin kaqkunata ch’usaqman tukuchipunqa, llapa ñak’ariytan chinkachinqa. Chay gobiernopi kausaqkunaqa Diospa munayninman jinan kausanqaku (Mateo 6:9, 10).

 Tukuy sonqoykumantan niykiku, Señor Jesuspa nisqanta kasukusun, makillataq kashasun, chhaynapin reparasun imaynas kay pachapi llapa imapas pasasqanqa Biblia willasqanman jinapuni kashan chayta (Marcos 13:37). Ama jinachu kay, Bibliamanta astawan yachayta munanki chayqa willarimuwayku. Bibliapiqa willashanmi imaynatas familiapi sumaqta kausasunman chayta, imayna kausaysi jamuq tiempoman kanqa chaytapas.