Askha runakunan cristianon kayku niqkunapas ninku: “Warmi qhari puñuymanta, casarasqa kausaymanta Bibliaq yachachisqanqa manañan kay tiemponchispaqñachu”, nispa. Chaymi wakin iglesiakunapiqa manaña ñaupaqpi jinañachu yachachinku imakunas allin imakunas mana allinchu chaymanta. Chhaynaqa, ¿Bibliapi yachachikuykuna kay tiemponchispi yanapawasunmanchu? Arí. Yachasunchis imaraykus yanapawasunman chaymanta.

 Imakunas allin imakunataq mana allinchu chayta yachananchispaqqa Diospa yanapaynintan necesitanchis. Paypa yanapayninwan kausananchispaqmi kamawarqanchis. Bibliapin nin: “Manan runaq munayninchu imayna kananpaqpas, runaqa manan yachakunchu imayna kanantapas”, nispa (Jeremías 10:23). Jehová a Diosqa imatapas ajllakunanchispaqmi kamawarqanchis, ichaqa manan imachus allin imachus mana allin chayta ninanchispaqchu kamawarqanchis. Chaypaqmi Diosqa munan paypi jap’ipakunanchista (Proverbios 3:5).

 Bibliapin tarikun Diospa kamachikuyninkuna imayna kausananchispaq, ¿imaraykun chay kamachikuykuna ancha allinpuni? Chaymanta yachasunchis.

•   Diosmi kamawarqanchis (Salmos 100:3). Diosllan yachan imatas necesitanchis kusisqa kausananchispaq, cuerponchispipas yuyayninchispipas allillan kananchispaq. Chaymantapas payqa yachanmi imas pasawasunman sichus payta mana kasukuqtinchis chayta (Gálatas 6:7). Jehová Diosqa allinninchistan munan. Chayraykun Bibliapi paymanta kayta nin: “Noqan Diosniyki Señor Diosqa kani, noqan allinniykipaq yachachiyki, noqan purinayki ñantapas pusayki”, nispa (Isaías 48:17).

•   Sonqonchisqa engañawasunmanmi. Askha runakunan piensanku imas allin imas mana allinchu chayta yachanankupaqqa sonqonkuq munasqanta kasukunankuta, ichaqa Bibliapiqa ninmi: “Runaq sonqonqa tukuy imamantapas aswan q’otukuqmi, millay ruwaqtaq kanpas”, nispa (Jeremías 17:9). Sichus sonqonchis imatapas ruwananchispaq tanqawasunman manataq Diospa yuyaykusqanman jinachu kanman chayqa, mana allinkunatan ruwasunman qhepamantaq pesapakusunman (Proverbios 28:26; Eclesiastés 10:2).

 Manan. Bibliaqa cheqaqtan Diosmanta willawanchis, yachachiwanchistaq imaynatan Dios munan kausananchista chaytapas (1 Corintios 6:9-11; Gálatas 5:19-23). Diosqa munanmi llapa runakuna Bibliapi chay cheqaq kaqta yachanankuta (1 Timoteo 2:3, 4). Chaymi religionkunapi umalliqkunaqa yachachinanku Bibliaq nisqanman jina (Tito 1:7-9).

 Askha runakunan Bibliapi kamachikuykunata mana kasukuyta munankuchu, chaymi maskhanku ‘munayninkuman jina ninrinkuq uyariy munasqallanta’ yachachiq religionkunata (2 Timoteo 4:3). Ichaqa Biblian sut’itapuni kayta nin: “¡Ay, qankunamanta! Mana allintan “allinmi” ninkichis, allintataq “manan allinchu” ninkichis”, nispa (Isaías 5:20). Diosmi cuentata mañanqa chay religionkunapi umalliqkunata imachus allin imachus mana allin Diospa nisqanta runakunaman mana yachachisqankumanta.

 Manan. Diospa munasqanta ruwaq runakunaqa Jesustan qatikunku, kamachikuyninkunatapas kasukunku. Jesusmi qatikuqninkunaman yachachiran jujkunata ama juzganankupaq, aswanpas llapa runakunata munakunankupaq, respetanankupaq ima (Mateo 5:43, 44; 7:1).

 Jesuspa qatikuqninkunaqa Diospa kamachikuyninkunata kasukuspan kausananku karan, ichaqa manan juzganankuchu karan Diospa munayninta mana ruwayta munaq runakunataqa (Mateo 10:14). Jesusqa manan qatikuqninkunata kamachiranchu politicatapas otaq imatapas utilizaspa runakunata obliganankupaq Diospa kamachikuyninkunata kasukunankupaq (Juan 17:14, 16; 18:36).

 Arí. Sichus kallpachakusunchis Diospa kamachikuyninkunata kasukunanchispaq chayqa, allinninchispaqmi kanqa kunan tiempopipas jamuq tiempopipas (Salmos 19:8, 11). Wakinkunan kaykuna:

•   Aswan kusisqan kasunchis (Proverbios 29:6).

•   Dioswanmi amigontin kasunchis (Proverbios 3:32).

•   Diosmi yanapawasunchis sasachakuykunapi tarikuqtinchis (Proverbios 11:8).

•   Jamuq tiempopin kay jallp’api wiñaypaq tiyasunchis (Salmos 37:29).