Kay 2024 watapin Juegos Olímpicos nisqa aparikushan, chaypiqa 206 nacionkunamanta deportistakunan participashanku, pisqa waranqa millón runakuna jinataq chayta qhawashanku. Presidente del Comité Olímpico Internacional Thomas Bach runan nirqan: “Juegos Olímpicos nisqapi participaqkunaqa yanapakushankun pachantinpi thajpi juj sonqolla kausananchispaq, chay yuyaywanmi Juegos Olímpicos nisqaqa aparikun”, nispa.

 ¿Atinmanchu Juegos Olímpicos nisqa runakunata jujllachayta? ¿Jayk’aqllapas atisunmanchu thajpi juj nisqalla kausayta?

 Kay watapin Juegos Olímpicos nisqapi imaymanata rikukurqan, chaypi participaqkunaqa imaymanapin rikuchirqanku runamasinkuta cheqnikusqankuta. Sut’itan rikukurqan imakunachus runakunata t’aqanachisqanqa: waj colorniyoq kasqanku, waj religionmanta kasqanku, wajcha otaq qhapaq kasqanku, jujkunapiwan.

 Juegos Olímpicos nisqapi participaqkunata qhawaspaqa asirikunchis distraekunchis iman. Chaypi participaqkunan ichaqa rimasqankuwan ruwasqankuwan rikuchirqanku jujkunata cheqnikusqankuta, manataqmi p’enqakunkuchu chayta ruwasqankumanta. Chayta ruwaspaqa manan yanapakushankuchu thajpi juj nisqalla kausay kananpaq.

 Bibliaqa willarqanñan kay tiempopi runakuna imaynachus kanankuta, chaymi runakunaqa mana juj nisqallachu kausashanchis (2 Timoteo 3:1-5). Chaymanta astawan yachanaykipaq leey “¿Imaynan kananku karqan kay tiemponchispi runakuna?” nisqa yachachikuyta.

 Bibliaqa willanmi jayk’aqchus runakuna thajpi juj nisqalla kausasunchis chayta. Diospa gobiernon janaq pachamanta kamachimuqtinmi kay pachapiqa thajpi juj nisqalla kausasunchis (Lucas 4:43; Mateo 6:10).

 Jesucriston Diospa gobiernonpiqa kamachimunqa, pay kamachimuqtinmi kay pachapiqa thajpi kausasun. Bibliapin kaykunata nirqanña:

•   “T’ika jinan chanin runaqa t’ikarinqa. Thaj kayqa kashallanqan”, nispa (Salmos 72:7).

•   “Paymi yanapay mañakuq wajchakunata libranqa […]. Pisichasqa kasqankumantan, sarunchasqa kasqankumantan orqonqa”, nispa (Salmos 72:12, 14).

 Kay tiempopipas Jesuspa yachachisqanqa 239 nacionkunamanta runakunatan jujllachashan. ¿Pikunatan jujllachashan? Jehová Diospa testigonkunata, paykunaqa thajpin pachantinpi iñiqmasinkunawan kausashanku. Imas paykunata yanapan chayta yachanaykipaq Qhawaq revistapi leey “Cheqninakuyta chinkachisun” nisqa yachachikuyta.