Maqasqa warmikunapaq yanapaykuna
Organización Mundial de la Salud willasqanman jinaqa, “warmikunaqa pachantinpin maltratasqa kashanku. Mast’arikuq millay onqoy jinaraqmi chayqa kashan, chaymi chaykunaq pasasqanmanta yachayqa ancha allinpuni”. Organización Mundial de la Salud qhawarisqanman jinaqa, “100 warmikunamanta yaqa 30 warmikunatas parejanku maqasqa, abusasqa ima”. Kay watakunallamanta rimaspan Organización de las Naciones Unidas willarqan sapa p’unchay yaqa 137 warmikuna wañuchisqa kasqankumanta, paykunataqa parejankus wañuchisqa wakintataq juj familianku. a
Chhaynaqa, sinchi problemapunin kashan warmi-qhari maqanakuyqa, chhaynapi tarikuqkunaqa sinchi k’irisqa sonqo nanasqa iman kashanku.
Yaqapaschá qanpas chhayna sasachakuypi tarikushanki. Pi reqsisqaykipaschá chhaynapi tarikushan. Chhayna kaqtinqa Bibliapi yachachikuykunan yanapasunki.
Manan qanpaq juchaykichu
Bibliapin nin: “Sapankanchismi kikinchismanta Diosman cuentata qosunchis”, nispa (Romanos 14:12).
Kayta yuyariy: Pichus maqashasunki chay runaqa Diosmanmi cuentata qonan kanqa.
Parejayki qanta juchachashasunki pay maqasqasunkimanta chayqa manan chhaynachu. Warmikunaqa munasqan kananku manan maqasqachu (Colosenses 3:19).
Mayninpiqa maqakuq runaqa manapaschá allinchu kashan, mana allin uywasqapaschá karqan chaymantapas machaq runapaschá. Imaynaña kaqtinpas Diosmanmi cuentata qonan kanqa. Chaymi kallpachakunan cambiananpaq.
Yanapaytan maskhanayki
Bibliapin nin: “Askha yuyaychaqkuna kaqtinmi ichaqa allin imapas lloqsin”, nispa (Proverbios 15:22).
Kayta yuyariy: Sichus manchasqa kashanki jinaspa mana ima ruwayta atishankichu chayqa yanapayta maskhay.
¿Imaraykun yanapayta necesitanki? Maltratasqa tarikushanki chayqa imaymanachá llakichishasunki, chayraykupaschá mana imanakuyta atishankichu. Manapaschá reparayta atishankichu kaykunamanta mayqen kaqsi aswan importante kanman chayta:
Vidaykichu
Wawaykikunaq allinninchu
Qolqechu
Parejaykita munakusqaykichu
Parejayki cambiananta suyaychu
Entiendenapaqmi chhayna sasapi tarikusqaykiqa. ¿Pimantan yanapayta mañakuwaq?
Confiasqayki familiaykiman amigoykimanpas willakuy. Paykunaqa yanapasunkikun, kallpachasunki iman. Qanmanta llakikuq runaman willakusqaykiqa maytan yanapasunki.
Maqasqakunata yanaqkunamanta telefononta yanapayta mañakuy. Chay telefononta wajakuqtiykiqa usqhayllan yanapasunkiku. Chay telefonota contestamuqkunaqa liston kashanku imaynata yanapanasunkikupaq imaynata cuidakuwaq chayta ninasunkikupaqpas. Sichus parejayki reparakun yanapay necesitasqanta cheqaqtataq cambiayta munan chayqa, chay telefonopin yanapayta chaskillanmantaq.
Juj organizacionkunamantapas yanapayta mañakuy. Chay organizacionkunan yanapasunki doctorkunata, enfermerakunata juj profesionalkunatapas tarinaykipaq, paykunan usqhaylla yanapasunkiku vidayki peligropi kashaqtin.
Manan sapallaykichu kashanki
Bibliapin nin: “Jehová b Diosqa sonqo nanasqakunawan kuskan kashan, sinchi llakisqakunatapas llakikuyninmantan libran”, nispa (Salmos 34:18).
Kayta yuyariy: Diosqa yanapasunkipunin, chaytan prometesunki.
Jehová Diosqa maytan qanmanta llakikun (1 Pedro 5:7) Payqa yachanmi imaynapi tarikusqaykita, entiendenmi imachus piensasqaykitapas, imayna sonqoykipi kashasqaykitapas. Simin qelqa Bibliawanmi yanapasunki. Chaymantapas paymanta yachayta kallpata ima mañakunaykitan munan (Isaías 41:10).
Maqanakuyqa chinkapunqan
Bibliapin nin: “Sapankankun uvas sach’anku k’uchupi, higos sach’anku k’uchupi tiyaykunqaku, manan pipas paykunataqa manchachinqachu”, nispa (Miqueas 4:4).
Kayta yuyariy: Bibliapin Dios prometen pisi tiempollamanta llapa familiapi thaj kausay kananta.
Jehová Diosllan llapa problemanchiskunata wiñaypaq allichapunqa. Bibliapin prometewanchis: “Diosmi runakunaq ñawinmanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu”, nispa (Apocalipsis 21:4). Chay tiempopiqa manan ima mana allinkunatapas yuyarisunñachu, aswanpas allinkunallatan yuyarisunchis allin yuyaykunallan umanchispi kanqa (Isaías 65:17) Chhayna sumaq thaj kausaytan Bibliapi prometesunki.