Jehová Diospa testigonkunaqa 200 más nacionkunapin Diosmanta yachachinku, chaymantapas llakipi tarikuqkunatan yanapanku. Ichaqa 35 nacionkunapi iñiqmasikunallan atinku donacionta churayta, ima gastonkutapas pagayta. Pisi nacionkunallataq donacionta churayta atinku chayqa, ¿maymantan qolqeta orqokun wajcha nacionkunapi hermanokunata yanapakunanpaq?

 Umalliq t’aqamanta hermanokunan allinta qhawarinku iñiqmasikuna allin iñiqniyoq kanankupaq imachus necesitasqankuta, Jehová Diospa llaqtanpi imakunachus ruwakushasqantapas. Iñiqmasikunaq qolqe churasqankutaqa allin yuyaywanmi utilizanku. Sichus juj sucursalpi hermanokunaq qolqe churasqankumanta puchun chayqa, juj sucursalmanmi apachinku. Chaytaqa ruwanku ñaupa tiempopi cristianokuna jinan, paykunaqa imachus puchuran chaytan pisichikuypi tarikuq iñiqmasinkuman apachiqku. Chhaynapi “imapas igual-lla kananpaq” (2 Corintios 8:14).

 Juj sucursalkunaq yanapayninta chaskispa, ¿imaynan sientekunku necesidadpi tarikuq hermanonchiskuna? Kusisqan kashanku. Tanzania nacionpiqa yaqa llapa runakunan pisi qolqellawan kausanku. Chaymi Mafinga llaqtapi juj juñunakuna wasita allichanankupaq juj sucursalkunaq qolqenta utilizakuran. Chay iñiq t’aqamanta hermanokunan ninku: “Juñunakuna wasita allichasqankumantapachan askha runakuna juñunakuyman jamushanku, chayraykun Jehová Diospa llaqtantapas mundontinpi llapa iñiqmasikunatapas gracias niyku qoykukuq kasqankumanta. Kunanqa juñunakunayku wasiqa munaymi kashan”, nispa.

 Sri Lanka nacionpi iñiqmasikunan coronavirus onqoypa kasqanwan mana mijunayoq kapuranku. Ichaqa juj nacionmanta iñiqmasikunaq donacionta churasqankuwanmi imachus necesitasqankuta chaskiranku. Paykunamanta wakinmi hermananchis Imara Fernando wawan Enoshpiwan. Paykunan sucursalman kayta qelqaranku: “Mundontinpi hermanonchiskunatan anchata agradecekuyku kay sasa tiempopi yanapawasqankumanta. Chaymi Jehová Diosmanta mañakushallayku kay tukukuy p’unchaykunapi hermanonchiskunata yanapashanallanpaq. Noqaykuqa Jehová Diospa llaqtanpi kasqaykumantan kusisqa kashayku”, nispa.

 Hermanonchiskunaqa maymantaña kanku chaypas llapallankun qoykukuq kanku. Hermananchis Imara Fernandoq wawan Enoshpas juj cajachatan ruwakuran qolqechanta juñunanpaq, chhaynapi donación cajachaman churananpaq. México nacionmanta Guadalupe Álvarez hermanapas manaña askhatachu ganan chaypas, tukuy atisqantan ruwan qolqechanta churaspa jujkunata yanapananpaq. Paymi nin: “Manaña qolqe churasqay askhachu chaypas, jujkunaq churasqanwanqa askhan juñukun, chay qolqewanmi yanapakun pisichikuypi tarikuq hermanonchiskunata. Noqaqa Jehová Diostan agradecekuni munakuq kasqanmanta”, nispa.

 Juj sucursalkunapas kusisqan qolqeta apachinku juj sucursalkunata yanapanankupaq. Brasil Sucursalmanta Anthony Carvalho hermanon nin: “Askha watakunan juj sucursalkuna qolqewan yanapawaranku, chaywanmi Diospa llaqtanqa sumaqta wiñariran. Kunanqa noqaykupas atiykuñan juj sucursalkunata qolqewan yanapayta. Hermanokunapas qolqechankutan churashallanku pachantinpi Diosmanta willakushanallanpaq”, nispa.

 ¿Imaynatan pisichikuypi tarikuq hermanokunata yanapasunman? Iñiq t’aqanchispi “Obra mundial” nisqa cajachaman qolqenchista churaspan, chaymantapas internetnintan qolqeykita churallawaqtaq, chaytan ruwawaq donate.pr418.com nisqa paginapi. Donacionkuna churakusqanqa ancha volorniyoqmi Jehová Diospaqqa.