Sapa watan tukuy tiemponkuwan Diosta serviq askha iñiqmasikuna Galaad escuelaman rinku, chay escuelaqa aparikun Patterson (Nueva York) llaqtapin. a Chay escuelaman riqkunaqa capacitaciontan chaskinku aswan allinta Diospa llaqtanpi llank’ayninkuta ruwanankupaq. Chaymi paykunaqa iñiq t’aqakunapi iñiqmasikunata otaq sucursalkunapi iñiqmasikunata allinta yanapanku.

 Galaad escuelamanqa askha nacionkunamantan jamunku. Chaymi 2019 watapi 147 kaq clasepi pisqa chunka soqtayoq estudiantekunaqa iskay chunka isqonniyoq nacionkunamanta karanku. Chay escuelaman riq iñiqmasikunaqa tukuy tiemponkuwanmi llank’asharanku sucursalkunapi, misionerokuna jina, precursor especial jina, otaq watukuq umalli jina.

 Chay escuela aparikunanpaqqa ñaupaqmantaraqmi imaymanata alistakun. Chaymi estudiantekunaq viajamunankupaq pasajekunata rantinku. 147 clasemanta sapanka estudiantepaq rantisqanku pasajeqa valeran 1.075 dolaresmi. Islas Salomón nisqamanta jamuq estudiantekunaqa tawa avionpiraqmi viajamuranku, kutipunankupaqtaq kinsa avionpi viajaranku. Paykunaqa 35.400 kilometrosta jinan viajamuranku. Sapanka hermanoq pasajenpiqa 2.300 dolaresmi gastakuran. Pasajekuna rantiymanta encargakuq hermanokunaqa baratollawan pasajekunata rantinankupaqmi juj programata utilizanku. Baratollawan pasajeta tarisqanku qhepamanpas chay programaqa maskhashallanmi aswan pisi qolqewan rantinapaq pasajekunata. Chaymantapas pasajekunata rantiymanta encargakuq hermanokunaqa utilizallankutaqmi créditos de aerolínea otaq las millas de viajero frecuente nisqakunata, chaykunataqa wakin hermanokunan Diospa llaqtanman qonku.

 Askha estudiantekunan Estados Unidos nacionman jaykunankupaq visa nisqata necesitanku. Chaymi Departamento de Asuntos Legales de la Central Mundial nisqapi llank’aq hermanokuna estudiantekunata yanapanku Estados Unidos nacionman jaykunankupaq visata orqonankupaq. Chay visata orqonapaqqa sapanka estudiantepaqmi 510 dolaresta gastakun.

 ¿Imapin yanapawanchis chay capacitacionta wakin iñiqmasinchiskunaq chaskisqanku? Hendra Gunawan sutiyoq iñiqmasinchismi umalliq jina llank’ashan Sureste Asiático ladopi kaq iñiq t’aqapi. Chay iñiq t’aqapin yanapakushallantaq Galaad escuelamanta casarasqa iñiqmasinchiskuna. Paymi nin: “Iñiq t’aqaykupiqa manan karanchu precursor regular iñiqmasikuna, paykuna chayamuqtinmi ichaqa tukuy sonqowan Diosta servisqankuta rikuspa jujkunapas Diosta astawan serviranku, wakinqa precursor regularmi kapuranku. Iñiq t’aqaykumanta jujnin hermanataq Diospa gobiernonmanta willaqkunapaq escuelaman riran”, nispa.

 Sergio Panjaitan sutiyoq iñiqmasiqa Galaad escuelamanta wakin iñiqmasikunawanmi Sureste Asiático sucursalpi llank’ashan. Paymi nin: “Galaad escuelaman riq iñiqmasikunaq yachamusqankuqa noqaykupaqpas juj sumaq bendicionmi karan. Paykunaqa imaymanatan yachamusqaku, ichaqa manan chay yachasqankuwanqa jatunchakunkuchu aswanpas tukuy yachasqankutan willawanku, chaykunawantaq noqaykupas juj iñiqmasikunata kallpachayku”, nispa.

 ¿Ima qolqewanmi Galaad escuelaman riqkunaq gastonkuta pagakun? Llapa nacionmanta iñiqmasikunaq qolqe churasqankuwanmi. Wakinmi chayta churanku internetninta donate.pr418.com nisqa paginanta. Qolqeykichista churasqaykichisraykun askha nacionkunamanta iñiqmasikunapaq Galaad escuela kan, chayraykun gracias niykiku qoykukuq kasqaykichismanta.