Jehová Diospa testigonkunaqa manan kunan jinaqa jayk’aqpas videokunatapas qelqakunatapas internetnintaqa chaskiranchischu. Ichaqa manan llapa hermanonchiskunachu internetniyoq kanku, wakin llaqtakunapi internet kanña chaypas, manan allintachu jaykun juj llaqtakunapitaqmi ichaqa manapuni kanchu.

 Kunanmi ichaqa internet manaña kanchu chaypas hermanonchiskunaqa atinku celularninkunaman videokunata qelqakunata churayta.

 ¿Imaynatan chayta ruwanku? JW Box nisqa cajachawanmi, chaytan apachikun maypichus internet mana kan chay iñiqt’aqakunaman. JW Box nisqa cajachamanmi Betel wasimanta hermanokuna churamunku videonchiskunata qelqanchiskunata ima, chay cajachan cuestan yaqa 300 soles jina.

 Iñiq t’aqamanta hermanonchiskunaqa JW Box nisqa cajachamantan videokunata qelqakunatapas celularninkuman orqonku. Ichaqa JW Box nisqa cajachamanqa sapa killanmi churana chayllaraq lloqsimuq videokunata qelqakunatapas, chayta ruwanapaqmi necesitakun internet, sichus internet mana kanchu chayqa, sucursalmi apachimun juj usebepi (USB) chayllaraq lloqsimuq videokunata qelqakunatapas, chay usebeqa valen yaqa 15 soles jinan.

 ¿Imaynatan JW Box nisqa cajacha iñiqmasinchiskunata yanapashan? República Democrática del Congo nacionmanta Nathan Adruandra nin: “Noqaqa munaranin ‘Jehová Diosniy, qanmanmi jap’ipakamuyki’, Lotpa esposanta yuyariychis nisqa videokunata celularniyman orqoyta, ichaqa manan atiranichu chaywanmi llakisqa kasharani. Kunanmi ichaqa JW Box cajachata apamusqankumantapacha celularniyman videokunata orqoyta atini, chay videokunawantaqmi wawaykunaman Jehová Diosmanta astawan yachachini”, nispa.

 Nigeria nacionpi JW Box cajachata instalaq hermanon nin: “Hermanonchiskunaqa JW Box nisqa cajachataqa Jehová Diospa regalonta jinapunin qhawarinku. Kunanqa facil-llatan runakunaman yachachinapaq videokunatapas, qelqakunatapas celularnikuman orqonku, chaykunata ruwaspan kusisqa kashanku”, nispa.

 África, Oceanía, Sudamérica ladopi kaq iñiqt’aqakunamanqa 1.700 más JW Box nisqa cajachakunatañan apachikuran. Chaymantapas juj iñiqt’aqakunamanmi apachikullanqataq. Ichaqa chay cajachakunata apachikunanpaqrí, ¿maymantan qolqe lloqsimun? Llapa nacionmanta iñiqmasikunaq qolqe churasqankuwanmi. Wakinmi chayta churanku internetninta donate.pr418.com nisqa paginanta. Gracias qoykukuq kasqaykichismanta.