Bibliaqa willaranñan cristianokunata Satanás qatiykachananta, chay jinapi ama predicanankupaq (Juan 15:20; Apo. 12:17). ¿Imallatapas ruwasunmanchu qatiykachasqa tarikuq hermanokunata yanapanapaq? Arí, paykunaraykun Diosmanta mañakusunman. Biblian nin: “Chanin runaq rogakuyninqa ancha atiyniyoqmi jujkunata yanapananpaq”, nispa (Sant. 5:16).

¿Imakunatan mañakusunman oracionninchispi? Jehová Diostan rogakusunman iñiqmasinchiskunaman valorta qonanpaq, jinallataq ama manchakunankupaqpas (Is. 41:10-13). Chaymantapas mañakusunmanmi autoridadkuna predicananchista ama jark’awananchispaq. Chhaynapi ‘thajpi sumaqta kausashanallanchispaq’ (1 Tim. 2:1, 2).

Pablowan Pedrowan qatiykachasqa tarikuqtinkun cristianokunaqa sutinkumanta wajakuspa Diosmanta mañakuranku (Hech. 12:5; Rom. 15:30, 31). Noqanchisqa manaña yachasunmanchu qatiykachasqa kashaq iñiqmasikunaq sutinta chaypas, nisunmanmi iñiq t’aqankuta, nacionninkuta otaq ima llaqtapi tarikusqankuta.