Jehová Diosqa pisi tiempollamantan millay runakunata chinkachipunqa. Chay tiempopiqa llapa pantasqa religionkunan chinkachisqa kapunqa, gobiernokunataq juñunakuspanku Diospa llaqtan contra jatarinqaku, jinan Jehová Diosqa millay runakunata Armagedón guerrapi wañuchipunqa. Llapanchismi chaykuna pasananta ima jinaraq suyakushanchis.

Manchay ñak’ariy tiempopi imakunachus pasananmantaqa manan llapantapuniqa yachanchischu. Manan yachanchischu ima ratupipunichus qallarinantaqa. Chaymantapas manan yachanchischu imachus gobiernokunata tanqanqa religionkunata chinkachinanpaq chayta, jayk’a tiempochus gobiernokuna Diospa llaqtan contra phawaykunqaku, imaynatachus chayta ruwanqaku, imaynatachus Jehová Dios Armagedón guerrapi millay runakunata wañuchinqa chaytapas.

Chhaynaña kaqtinpas manan manchakunanchischu jamuq tiempopi imachus pasananmantaqa. Bibliapiqa imachus necesitasqanchistan willawanchis. Chaypin willawanchis tukukuy p’unchaykunapi tiyashasqanchista (2 Tim. 3:1). Chaymantapas willashanmi Diospa llaqtan ama chinkananpaq manchay ñak’ariy p’unchaykuna pisiyachisqa kananta (Mat. 24:22). Chaymantapas yachanchismi Jehová Diosqa llaqtanta salvananta (2 Ped. 2:9). Chaymantapas yachanchismi Churin Jesucristota gobiernonpi reyta churasqanta, paymi millay runakunata Armagedón guerrapi wañuchipunqa ancha askha runakunatataq salvanqa (Apo. 19:11, 15, 16).

Tukuy chaykunata rikuspan runakunaqa manchakuymanta khatatatanqakuraq (Luc. 21:26). Noqanchismi ichaqa mana paykuna jinachu manchakusun. Bibliapin willashan Jehová Diosqa ñaupa tiempopi llaqtanta salvasqanta, chaymantapas willashanmi jamuq tiempopi llaqtanta salvananmanta. Sichus chaykunata leespa yuyaymanasun chayqa, mana iskayaspan Lucas 21:28 textopi nisqanta kasukusun, chaypin nishan: “Allinta sayaychis umaykichistapas oqariychis; kacharichisqa kanaykichismi chayamushanña”, nispa.