Juch’uyniymantapachan campopi kayta munaq kani. Chaymi Jyväskylä llaqtaq ladonpi kaq munay sach’akunaq qochakunaq kasqanman familiaypiwan paseaq riq kayku, chayqa kashan Finlandia nacionpin. Noqaqa animalkunataqa munakuqmi kani, chaymi wawa kaspayqa ima alqotapas michitapas marq’aykuytapuni munaq kani. Wiñaruspayqa llakikuqmi kani animalkunata maltratasqankuta rikuspay, chaymi animalkunata defiendeq organizacionman jaykurani, chaypin reqsirani noqa jina piensaq runakunata.

Noqaykuqa campañakunatan ruwaq kayku animalkunata respetachinaykupaq chaymi qelqakunata rakiq kayku, jinallataq animalkunaq qaranta vendeq tiendakuna contra laboratoriokuna contra ima huelgakunata ruwarayku. Chaymantapas animalkunata defiendeq organizaciontan paqarichirayku. Jinan chaykuna ruwasqaykurayku autoridadkunawan problemapi karayku, chaymi carcelman apawaranku juiciokunapitaqmi tarikuranipas.

Manan animalkunallamantachu noqaqa llakikuq kani, juj problemakunamantapas llakikuqmi kani, chaymi jaykurani Amnistía Internacional nisqa organizacionman Greenpeace nisqa organizacionmanwan, chaypin noqaqa tukuy tiempo yanapakurani. Chaymantapas wajchakunata mana piniyoqkunatan yanapallaqtaq kani.

Tiempowanmi repararani kay pachata mana cambiay atisqayta. Mayninpiqa wakin juiciokunata ganaqña kayku chaypas, kashallaranmi problemakunaqa. Kay pachapiqa astawanmi mana allinkuna yapakushan, chay pasasqanqa manan pimanpas imapas qokuqchu, chayta rikuspaymi llakisqa sientekuq kani.

Ñaupaqpiqa Jehová Diospa testigonkunawanmi Bibliamanta yacharani, paykunaqa khuyapayakuq runakunan karanku chaywanpas manan imachus piensasqaytaqa cambiayta atiranichu. Ichaqa kay pachapi problemakunata mana allichayta atispaymi Diospi piensayta qallarirani.

Jinan Bibliayta leerani, chaypin tarirani Proverbios 12:10 textota, chaypin nin: “Chanin runaqa uywankunatan allinta rikun”, nispa. Chay leesqaymi noqapaqqa juj jampi jina karan. Chaymantapas allintan entienderani kay pachapi problemakuna kasqanmantaqa mana Jehová Dioschu juchayoq kasqanta, aswanpas problemakunaqa kasqa runakuna Diospa kamachisqanta mana kasukusqankuraykun. Chaymantapas yachallaranitaqmi Diosqa munakuq pacienciakuq kasqanta, chayta yachasqayqa sonqoymanmi chayaran (Salmos 103:8-14).

¿Imatapunin Biblia yachachin? librota apamuwanankupaqmi juj correota apachirani. Jinan chay qhepallaman Jehová Diospa iskay testigonkuna visitamuwaranku. Paykunan niwaranku: “¿Bibliamanta yachayta munawaqchu?” nispa. Jinan kaqratopacha nirani: “Ya”, nispa. Pisi-pisimantan juñunakuykunamanpas risharaniña, Jehová Diosmanta chaypi yachasqaymi sonqoyman chayawaran.

Bibliamanta yachasqaymi yanapawaran mana allin kausayniyta saqepunaypaq. Manañan cigarrotapas fumaniñachu, manan machaniñachu, manañan qhelli simikunatapas rimaniñachu, imayna p’achakusqaytapas cambiapunin, autoridadkunatapas kunanqa respetanin (Romanos 13:1). Ñaupaqpiqa mana allinkunatan ruwarani kunanmi ichaqa Bibliaq nisqanman jina kausashani.

Chay organizacionkunaqa runakunatan yanapasharan chaymi noqapaqqa sasa karan paykunamanta t’aqakuyqa. Chay organizacionkuna allintaña ruwasharanku chaypas, cuentatan qokurani Diospa gobiernollan kay pachapi problemakunata tukuchinanta. Kunanqa tukuy tiempoywanmi Diospa gobiernonmanta jujkunaman yachachishani (Mateo 6:33).

Diosmanta manaraq yachashaspaqa wakin runakunatan nishuta cheqnikuq kani, kunanmi ichaqa Bibliamanta yachasqay yanapawashan llapa runakunata munakunaypaq (Mateo 5:44). Runakunata munakusqaytan rikuchini Jehová Diosmanta llapa runakunaman willaspay. Chay yachachisqaywanqa runakunatan yanapashani juj nisqalla kusisqa kausanankupaq, sumaq suyakuyniyoq kanankupaqpas.

Noqaqa confianin Jehová Dios kay pachapi problemakunata tukuchinanpi, chaymi thaj sientekuni. Jehová Diosqa manan jinallatachu qhawanqa animalkunaq sufrisqantapas ni runakunaq sufrisqantapas aswanpas pisi tiempollamantan chinkachipunqa. Chaymantapas Diospa gobiernonqa runakunaq mana allin ruwasqankunatan allichanqa (Isaías 11:1-9). Noqaqa kusisqan kashani Jehová Diosmanta yachaspay, jujkunaman paymanta yachachisqaymantapas. Kunanqa manañan kay pacha cambiaypiqa piensaniñachu.