1-6. Imaynatachus maykunapichus Jehová Diospa testigonkuna Diosmanta willashanku chayta willay.

 REBECA hermananchismanta rimasun, payqa Ghana nacionmantan. Rebecaqa escuelanpin Diosmanta willaq. Recreo horaspin compañeronkunaman Diosmanta yachachiq, chaymi mochilanpiqa apallaqpuni imaymana qelqakunata. Askha compañerankunamanmi estudiotapas qorqan.

² África ladopi Madagascar nisqa islapin juj casarasqa warmi-qhari precursorkuna 25 kilometrosta jina purinku estudiota qonankupaq. Paykunaqa ruphaypin purinku askhamantaqmi estudiotapas qonku.

³ Paraguay nacionmanta wakin hermanokunan juj nacionmanta hermanokunapiwan juj juch’uy barcota ruwarqanku Paraguay, Paraná nisqa mayukunaq cantonpi tiyaq runakunaman Diosmanta willanankupaq. Chay barcoqa wasi jinan, chaymanqa jaykun 12 runakunan, chay barcopin ñaupaqpi mana jayk’aq chayasqanku llaqtakunaman Diospa siminta chayachishanku.

⁴ Alaska ladopi kaq testigokunan q’oñi tiempopi tukuy atisqankuta ruwanku Diosmanta willanankupaq. Paykunaqa Polo Ártico nisqamanraqmi chayanku, chay killakunan askha barcokunaq sayananpi askha rimaypi qelqakunantin sayanku, chaymanqa tukuy nacionmanta runakunan jamunku. Chaymantapas chay ladokunapi maymanpas chayanapaqqa juch’uy avionpin viajana, chay avionkunapin iñiqmasikunaqa Aleutiana, Atabascana nisqa ayllukunaman chayanku, jinallataq Chimesiana Coluchana nisqa ayllukunamanpas.

⁵ Juj hermanonchismanta yachasun, paypa sutinmi Larry, paytan juj accidente pasasqa. Chaymi juj silla de ruedas nisqapi kashan, chaywanpas payqa manan jinallachu kashan aswanmi kuraqkunaq tiyasqan wasipi Diosmanta willan. Payqa imaynas jamuq tiempopi qhali puririnqa chaymantawansi willan (Isa. 35:5, 6).

 ⁶ Myanmar nacionpin Mandalay llaqtamanta juj grupo testigokunan viajarqanku asambleata uyarinankupaq. Paykunaqa kinsa p’unchaymi viajarqanku, ichaqa manan jinallachu viajarqanku, Bibliamanta askha qelqakunatan aparqanku paykunawan viajaq runakunaman qonankupaq. Chaymantapas maypichus chay barco sayaykuqtinmi paykunaqa usqhaylla uraykuspa qelqakunata rakimuqku. Kutimunankupaqqa juj runakunañan barcopiqa kasharqanku.

7. a) ¿Imayna formakunapin testigokuna Diosmanta willanku? b) ¿Imaraykun tukuy chaykunata ruwanku?

⁷ Chay willasqanchiskunan rikuchin imaynas Diosta serviqkunaqa allintapuni “Diospa gobiernonmanta” willashanku chayta (Hech. 28:23). Paykunaqa wasin-wasinta, callekunapi, telefonopi iman Diosmanta willashanku. Viajaspapas parquepi kashaspapas, llank’anapi samarispapas willashallankun. Chhayna imaymana formapin paykunaqa Diosmanta willashanku. ¿Imaraykun chayta ruwanku? Paykunaqa llapa runakunamanmi Diosmanta willayta munanku (Mat. 10:11).

8, 9. a) ¿Imaraykun nisunman “admirakunapaqmi Diosmanta willay mast’arikusqanqa” nispa? b) ¿Imanispan mayninpi tapukusunman, imatan ruwananchis chayta yachanapaq?

⁸ ¿Imanisunmanmi personaykimanta? ¿Qanpas 235 nacionkunamanta jujninpichu Diosmanta willashanki? Chhayna kaqtinqa kay llank’ay yapakusqanpin yanapakushanki. Chhaynata pachantinpi Diosmanta willasqanchisqa admiranapaqmi. Manan noqanchistaqa imapas jark’awanchischu: cheqnisqaña, qatikachasqaña, jark’asqaña kanchis chaypas Diosmantaqa willashallanchismi. Llapa runakunamanmi allintapuni willashanchis, lliu pachantinpin Diospa gobiernonmanta allin willakuyta willashanchis.

⁹ Chaykunata yachaspa yaqapaschá tapukusunman: “¿Imaraykutaq kay llank’aytari mana pipas sayachinchu? ¿Imaraykun Satanaspas mana sayachiyta atinchu?”, nispa. Chayta yachananchispaqqa apostolkunaq Diosmanta imayna willasqankumanta yachaymi yanapawasun. Jehová Diospa testigonkunaqa paykunaq qallarisqan llank’ayllatan seguishanchis.

10. a) ¿Ima llank’aymanmi Jesús tiempontapas kallpantapas qorqan? b) ¿Payllachu chay llank’ayta tukunan karqan?

¹⁰ Cristiano iñiq t’aqata qallarichiqqa tukuy kallpanta, tiemponta, tukuy imaymanatan qorqan Diosmanta allin willakuykunata willayman; payqa Jesusmi karqan. Pay kikinmi nirqan: “Juj llaqtakunapipas willamunaymi Diospa gobiernonmanta allin willakuykunataqa,  chaypaqmi Diosqa kachamuwarqan”, nispa (Luc. 4:43). Ichaqa Jesusqa yacharqanmi chay llank’ay qallarisqanta mana tukunanta. Manaraq wañupushaspan payqa nirqan: “Llapa nacionkunapiraqmi allin willakuykuna willasqa kanan”, nispa (Mar. 13:10). Chhaynaqa, ¿pikunan chay llank’ay qallarisqanta tukunanku karqan, imaynatan chayta ruwananku karqan?

11. ¿Ima jatun llank’aytan Jesús discipulonkunaman qorqan? ¿Imaynata yanapananpaqmi prometerqan?

¹¹ Jesusqa kausarimpusqan qhepamanmi jatun llank’ayta discipulonkunaman qorqan. Paykunatan nirqan: “Chayrayku, llapa nacionmanta runakunaman riychis, jinaspa yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. Qankunaman llapa kamachisqaykunata imaynatachus kasukunanku chayta paykunaman yachachimuychis. Noqaqa sapa p’unchaymi qankunawan kashasaq kay tiempoq tukukapunankama”, nispa (Mat. 28:19, 20). “Qankunawanmi kashasaq” nispa Jesús discipulonkunata nisqanwanqa “Diosmanta willaypin yanapasaykichis” nisharqanmi. Chay yanapayqa allinpunin paykunapaqqa karqan. Jesús kikinpunin ñaupaqmanta nirqan imaynas lliu nacionmanta runakuna paykunata cheqnikunanku karqan chayta (Mat. 24:9). Chaymantapas paykunaqa juj yanapaytawanmi chaskinanku karqan. Manaraq janaq pachaman ripushaspan paykunata nirqan: “Espiritutan kachamusaykichis”, nispa. Chhaynapi chaypa kallpanwan “kay pachaq k’uchunkunakamaraq chayanankupaq” (Hech. 1:8).

12. ¿Ima tapuykunatan tapukusunman, imaraykun chaykunamanta yachananchispuni?

¹² Chhaynataq chaykuna karqan chayqa, yaqapaschá ñaupa tiempo apostolkunamanta discipulokunamantapas tapukusunman: “¿Jesuspa nisqanman jinapunichu paykuna ruwarqanku? Pisitaq karqanku qatikachasqataq kasharqanku chayqa, ¿llapa runakunamanchu Diospa gobiernonmanta willakuyta willankuman karqan? ¿Cheqaqtapunichu Diospa espiritunpa yanapayninta juj yanapaykunatapas chaskinkuman karqan?”, nispa. Chaykunamantan willashan Hechos nisqa libroqa. Chaykunataqa yachananchispunin. ¿Imaraykutaq yachananchisri? Jesuspa nisqan jina Diosmanta willakuyqa, jujkunatapas yachachiyqa kay tiempoq tukukunan p’unchaykaman aparikunan karqan. Chaymi noqanchis kay tukukuy tiempopi tiyaqkunaqa yachananchispuni chaykunataqa. Chhaynapi chay willakuyta aparinanchispaq. Chayraykun Hechos libroq imachus willasqantaqa allinta yachananchis.

13, 14. a) ¿Pin qelqarqan Hechos librota? ¿Maymantan Hechos librota qelqaq tukuy chaykunata yacharqan? b) ¿Imakunamantan Hechos libropi willashan?

¹³ ¿Pin Hechos librota qelqarqan? Manaña Hechos libropi willakunchu chaypas qallariyninpi willasqanman jinaqa Lucasmi qelqanman karqan (Luc. 1:1-4; Hech. 1:1, 2). Ñaupa tiempomantapachan chay librotaqa reqsikun médico Lucaspa qelqasqanta jina (Col. 4:14). Chay libroqa willashan 33 watapi Jesús janaq pachaman ripusqanmanta 61 watapi jina apóstol Pablo Romapi carcelasqa kasqankama imakunachus pasasqanmantan. Chay librota qelqaqqa manapas pay chaypichu kashanman jinatan mastaqa willan. Wakin partekunapin ichaqa chaypipas kashanman jinata willan. Wakin partekunapin nishan “noqaykuqa”, “suyamuwarqanku” nispa. Chaykunan sut’ita rikuchin imaynas chay kutikunaqa Lucas chaypi kasharqan chayta (Hech. 16:8-10; 20:5; 27:1). Yachasqanchis jina Lucasqa allinta t’aqwispan imatapas qelqaq. Chhaynataq chayqa yaqapaschá Hechos librota qelqananpaqqa rimarqan apóstol Pablowan, Bernabewan, Felipewan juj discipulokunawanpas.

¹⁴ ¿Imakunamantan Hechos libropi willashan? Lucasqa ñaupaq kaq qelqasqan libropiqa Jesuspa imakunachus rimasqanmanta imakunachus willasqanmanta iman willashan. Hechos libropin ichaqa willashan Jesuspa qatikuqninkuna imakunatachus ruwasqankumanta. Chaymantapas Hechos libropin willashan ima jatun ruwaykunatachus chay tiempopi cristianokuna ruwarqanku chayta. Paykunataqa mana educasqa común runakunata jinallan reqsirqanku chaypas admiranapaq ruwaykunatan ruwarqanku (Hech. 4:13). Arí, chay libropin willashan imaynatachus Jesusta qatikuqkuna paqarirqanku, imaynatachus lliuman mast’arikurqanku chaykunamanta. Willashanmi imaynatachus Diosmanta willaqku, may ganaswansi willaqku chaykunata (Hech. 4:31; 5:42). Willashanmi imaynatachus Diospa espiritun paykunata yanaparqan chaykunata (Hech. 8:29, 39, 40; 13:1-3; 16:6; 18:24, 25). Willashanmi imamantachus llapa Bibliapas willashan chayta: imaynas Diospa sutinpas jatunchasqa kananta, chaytan Jesús kamachikusqanpi ruwanqa. Willashallantaqmi imaynas lliuña jark’akurqanku chaypas Diospa gobiernomanta willakuy llapa llaqtakunaman chayarqan chaymantapas (Hech. 8:12; 19:8; 28:30, 31).

15. ¿Imakunapin yanapawasun Hechos librota estudiay?

¹⁵ Ñaupa tiempopi Jesusta qatikuqkuna imakunachus ruwasqankuta allinta yachasun chayqa kallpachawasunmi tukuy sonqo Diospi confiananchispaq. Mana manchakuspa kallpawan imachus  ruwasqankuta yachaymi yanapawasun paykuna jina kananchispaq. Chaykunan yanapawasun Jesuspa imakunachus nisqanta allinta junt’ananchispaq. Paymi nirqan: “Riychis, jinaspa yachachimuychis discipuloykuna kanankupaq”, nispa. Kay libron yanapawasun Bibliapi Hechos librota allinta entiendenanchispaq.

16. ¿Imapaqmi kay libro ruwasqa kashan?

¹⁶ ¿Imapaqmi kay libro ruwasqa kashan? Juj, kay librota estudiaspan reparasun imaynatas Diospa espiritun yanapawashanchis paymanta willananchispaq, payta servinankupaq runakunata yanapananchispaqpas. Iskay, kay libron yanapawasun ñaupa tiempo cristianokuna jina tukuy kallpawan ganaswan Diosmanta willananchispaq. Kinsa, kay libron yanapawallasuntaq Diospa llaqtanta pusariq umalliqkunata respetananchispaq, jinallataq iñiq t’aqapi umalliqkunatapas respetananchispaq.

17, 18. ¿Imayna ruwasqan kay libro kashan? ¿Ima yanapaykunan kashan Hechos librota estudiananchispaq?

¹⁷ Kay libroqa pusaq t’aqapi t’aqasqan kashan. Sapanka t’aqan Hechos libromanta orqosqa kashan. Chaymantapas kay libropiqa manan Hechos libromanta sapanka versiculokunamantachu willashan, aswanpas ima yachachikuykunachus kay tiempopi yanapawasunman chaykunamantan astawanqa willashan. Sapanka capituloq qallariyninpin willashan imamantachus chay capítulo willanqa chayta, ima textokunamantachus willanqa chaytawan.

¹⁸ Chaymantapas kay libropiqa juj yanapaykunan kashallantaq, chaykunan yanapawasun Hechos librota allinta estudiananchispaq. Kay librota astawan entiendenanchispaqmi kashan munay fotokuna, dibujokuna ima. Hechos libropi wakin capitulokunapiqa juj yachachikuykuna iman kashan, chaykunapin willashan  wakin llaqtakunamanta wakin runakunamanta imachus pasasqanmanta, costumbrenkunamanta juj ruwaykunamantawan ima.

19. ¿Imatan mayninpi tapukunanchis?

¹⁹ Kay libroqa imaynachus Dios serviyninchispi kashanchis chayta yachananchispaqmi allinta yanapawasun. Chayllaraq Diosta servishanchis chaypas unayña servishanchis chaypas, allintan piensarinanchis imatas vidanchispi ñaupaqman churashanchis chayta, imaynatas Diosmanta willaytapas jujkunaman yachachiytapas qhawarishanchis chaykunata (2 Cor. 13:5). Sapankanchismi tapukunanchis: “¿Importante ruwanata jinachu Diosmanta willayta qhawarishani?” (1 Cor. 7:29-31). “¿Tukuy sonqowanchu ganaswanchu Diosmanta willani?” (1 Tes. 1:5, 6). “¿Tukuy atisqaytachu ruwani chay llank’aypi yanapakunaypaq?”, nispa (Col. 3:23).

20, 21. a) ¿Imaraykun Diosmanta willayta usqhaylla aparinanchis kashan? b) ¿Ima ruwaytan ñaupaqman churananchis?

²⁰ Ama jayk’aqpas Diosmanta willay llank’aytaqa saqesunchu, Diospa p’unchayninqa cercapiñan kashan. Chayraykun astawanraq Diosmanta willananchispaq tiemponchista qonanchis. Manan munasunmanchu runamasinchiskuna mana willasqanchis causa wañunankutaqa (Hech. 13:48). Manan yachanchischu jayk’a runachus uyarikunqaku chaytaqa, ichaqa tukuy atisqanchistan ruwananchis paykunata yanapananchispaq. Manaraq tiempo chayamushaqtinmi usqhaylla chayta ruwashananchis (1 Tim. 4:16).

²¹ Ñaupa tiempopi Jesusta qatikuqkuna jinan tukuy sonqowan kay llank’aytaqa aparinanchis. Kay libron chayta ruwananchispaq yanapawasun. Sapa p’unchay mana manchakuspa ganaswan willananchispaqmi kallpata qowasun. Imaña kaqtinpas allintapuni Diospa gobiernonmanta willananchispaqmi yanapawasun, chay ruwaytan ñaupaqman churananchis (Hech. 28:23).