Jehová Diosmi Edén huertata ruwarqan. Chay huertapin karqan askha t’ikakuna, sach’akuna, animalkunapas. Chay qhepamanmi Diosqa Adanta ruwarqan. Jallp’amanta ruwaspan senqanpi phukuykurqan. ¿Iman chay ratupi pasarqan? ¡Adanmi kausayta qallarirqan! Jehová Diosmi Adanta kamachirqan Edén huertata cuidananpaq, animalkunamanpas sutita churananpaq.

Jehová Diosmi Adanman juj importante kamachikuyta qorqan. Nirqanmi: “Atinkin llapa sach’akunamanta frutakuna mijuyta, juj sach’amantan ichaqa amapuni mijunkichu. Chay frutata mijunki chayqa wañupunkin”, nispa.

Chay qhepamanmi Jehová Diosqa nirqan: “Adanpa yanapaqninta ruwasaq”, nispa. Jinan Adanta misk’ita puñurachispa jujnin wajtanta orqospa esposanta ruwarqan. Sutinmi karqan Eva. Adanwan Evawanmi ñaupaq kaq familia karqanku. ¿Imaynan Adán sientekurqan esposanta rikuspa? Anchatan kusikurqan, jinan nirqan:  “¡Ancha munay warmitan jujnin wajtaymanta Diosqa ruwarusqa! ¡Kusisqan kashani noqa jina runata rikuspay!”, nispa.

Jehová Diosmi Adanta Evatawan nirqan askha wawayoq kanankupaq, jallp’antinman junt’anankupaqpas. Diosqa munarqanmi kusisqa kausanankuta, jallp’anchistapas paraisoman tukuchinankuta. Ichaqa manan chhaynachu kashan. ¿Imarayku? Qatimuq capitulopi chaymanta yachasun.