Jesuswan discipulonkunawan Galileata viajarqanku, viajepin Jesusqa Sicar llaqta qayllapi samarqan “Jacobpa pozon” nisqapi. Discipulonkunataq llaqtata rirqanku mijuna rantiq.

Jinan Samariamanta warmi jamurqan unuta orqoq, Jesustaq unuta mañakurqan. Warmitaq tapurqan: “¿Imaynapitaq Samariamanta kashaqtiy noqawan rimanki? Judiokunaqa manan noqaykuwan rimankuchu”, nispa. Jesustaq nirqan: “Pichus kasqayta yachawaq chayqa, qanchá unuta mañakuwankiman, noqataq kausay unuta qoykiman”, nispa. Warmitaq nirqan: “¿Imaynata? Manan unu orqonaykipaq imaykipas kanchu”, nispa. Jesustaq nirqan: “Unu qosqayta ujaqqa manan jayk’aqpas ch’akichikunqachu”, nispa. Warmitaq nirqan: “Chay unuta qoykuway”, nispa.

Jesustaq warmita nirqan: “Phaway, qosaykita wajaramuy”, nispa. Warmitaq nirqan: “Manan qosayqa kanchu”, nispa. Jesustaq nirqan: “Sut’illantan nishanki. Qanqa pisqa qosayoqmi karqanki, kunan kaqmi ichaqa tiyaqmasillayki”, nispa. Warmitaq nirqan: “Profetamá kasqanki, llaqtaypiqa orqopin Diosta adoranku, judiokunataq ninku: Jerusalenpin Diostaqa adorana, nispa. Mesiaschá yachachiwanqaku imaynata Diosta adorana kasqanta”, nispa. Jinan Jesusqa nirqan: “Noqan Mesiasqa kani”, nispa.

Jinan warmiqa Samariaman rispa runakunata nirqan: “Yaqachus jina Mesiasta tarimuni.  Payqa tukuytan noqamanta yachan, rikuchimusaykichis”, nispa. Jinan payta qatikuspa Jesusman rirqanku yachachisqanta uyarinankupaq.

Chay qhepamanmi Samaria llaqtamanta runakunaqa Jesusta valekurqanku llaqtankupi qhepakunanpaq. Jinan iskay p’unchay chaypi qhepakurqan paykunata yachachispa, chaymi askha runakuna paypi iñirqanku. Jinan runakunaqa warmita nirqanku: “Jesusta uyarispan yachayku paypuni runakuna salvaq kasqanta”, nispa.