Jesusqa bautizakusqan qhepamanmi predicayta qallarirqan: “Diospa gobiernonmi qayllaykamunña”, nispa. Discipulonkunaqa paywan kuskan viajarqanku Galilea Judea llaqtakunata. Nazaret llaqtanman kutimuspataq sinagogata rirqan, jinaspa Isaiaspa qelqasqanta leerqan: “Jehová Diosmi santo espiritunta qowarqan allin willakuykunata willanaypaq”, nispa. Milagrokunataña Jesús ruwarqan chaypas, allin willakuykunata willananpaqmi astawanqa Diospa espiritunta chaskirqan. Chaymi uyariqninkunata nirqan: “Kunanmi kay profecía junt’akun”, nispa.

Chay qhepamanmi Jesusqa Galilea lamar-qochaman rirqan chaypin tarirqan tawa discipulonkunata, paykunaqa challwaqkunan karqanku, sutinkun karqan Pedro, Andrés, Santiago, Juan. Jinan paykunata nirqan: “Qatikamuwaychis, jinaspa runakunata challwankichis”, nispa. Chaymi paykunaqa negocionkuta saqespa Jesusta qatikurqanku. Paykunawanmi Galileaq sinagogankunapi, mercadonkunapi, callenkunapi ima Diospa gobiernonmanta predicarqanku. Askha runakunan qatikurqanku. Jesusmantaqa Siria nacionpiwanraqmi uyarikurqan.

Tiempowanmi Jesusqa wakin discipulonkunaman atiyta qorqan runakunata qhaliyachinankupaq, supaykunatapas runamanta qarqonankupaq. Jujkunataq Jesuswan kuska llaqtan-llaqtanta ayllun-ayllunta purirqanku predicaspa. Dios sonqo warmikunapas yanaparqankun, wakinmi karqanku Juana, Susana, María Magdalena.

Discipulonkunata preparaspan Jesusqa kacharqan predicamunankupaq. Jinan Galilea llaqtakunapi predicarqanku, chaymi askha runakuna Jesuspa discipulon kaspa bautizakurqanku. Askhan Jesuspa discipulon kayta munarqanku, paykunatan Jesusqa compararqan cosechanapaq chajrawan. Chaymi nirqan: “Diosmanta mañakuychis aswan askha llank’aqkunata cosechaman kachamunanpaq”, nispa. Qhepamanmi 70 discipulonkunata kacharqan Judeapi predicanankupaq. Askha runakunamanmi Diospa gobiernonmanta predicarqanku.  Predicasqankumanta kutimuspataq Jesusman willarqanku imakunatachus ruwasqankumanta. ¡Manan Satanaspas jark’ayta atirqanchu!

Jesusqa allintan discipulonkunata prepararqan janaq pachaman ripusqan qhepamanpas kay pachapi predicashanallankupaq. Paykunatan nirqan: “Allin willakuykunatan mundontinpi willankichis. Diospa siminta yachachispan bautizankichis”, nispa.