Juj p’unchaymi Eva sapallan kashaqtin juj mach’aqway Evata tapurqan: “¿Cheqachus Dios mana munanchu frutakuna mijunaykichista?”, nispa. Evataq kutichirqan: “Manan chhaynachu, llapa sach’akunamanta frutataqa mijuykumanmi juj sach’allamantan manaqa. Chayta mijuspaqa wañuykumanmi”, nispa. Mach’aqwaytaq nirqan: “Manan wañunkichischu, aswanpas Dios jinan kapunkichis”, nispa. Mach’aqwayqa llullakusharqanmi, Evan ichaqa creerqan, astawan qhawaqtinmi astawan mijuyta munarqan. Jinan mijurapurqan, chaymantataq Adanman qorqan. Adanqa yacharqanmi Diosta mana kasukuspaqa wañupunanku kasqanta. Chhaynaña kaqtinpas mijurqanmi.

Chay tardenmi Diosqa Adanta Evatawan tapurqan: “¿Imaraykun mana kasuwarqankichischu?”, nispa. Jinan Evaqa mach’aqwayman tumpaykurqan Adantaq Evaman. Mana kasukusqankumantan Diosqa Edén huertamanta qarqopurqan. Jinaspa huerta jaykuna punkupi angelkunata churarqan rauraspa muyushaq espadatawan mana pi runapas jaykunanpaq.

Evata engañaqpas castigasqa kanan karqan. Chay engañaqqa manan mach’aqwaychu karqan. Jehová Diosqa manan machaqwaytaqa rimananpaqchu ruwarqan. Aswanpas juj millay angelmi mach’aqwayta rimachirqan. Chay angelpa sutinmi Satanás. Diosqa jamuq tiempopin Satanasta wañuchipunqa, chhaynapin payqa manaña pi runatapas engañanqachu millaykunata ruwananpaq.