Abrahanqa yachachirqanmi wawanman Jehová Dios munakuyta, promesankunapipas confiayta. Ichaqa Isaac 25 watanpi jina kashaqtinmi Jehová Diosqa Abrahanta kamachirqan juj sasa ruwayta ruwananpaq. ¿Imataq chayri karqan?

Diosmi Abrahanta nirqan: “Sapallan wawaykita Moria orqoman apaspa sacrificiopi jaywamuway”, nispa. Abrahanqa manan yacharqanchu imarayku Jehová Dios munarqan chay ruwananta, chaywanpas kasukurqanmi Diosta.

Qhepantin p’unchaymi Abrahanqa tutamantanta jatarispa Isaacwan iskay runankunapiwan Moria ladoman rirqanku. Kinsa p’unchayta purisqanku qhepamanmi orqota rikurqanku. Jinan Abrahanqa iskaynin runankunata nirqan: “Kayllapi suyawaychis”, nispa. Abrahanwan Isaacllawanñan orqoman wicharqanku. Isaacmi llant’ata q’epirqan Abrahantaq cuchillota aparqan. Jinan Isaacqa papanta tapurqan: “¿Maytaq sacrificanapaq ovejari?”, nispa. Abrahantaq nirqan: “Jehová Diosmi qowasun wawáy”, nispa.

Orqoman chayaqtinkun altarta ruwarqanku. Chay qhepamanmi Abrahanqa Isaacta wataspa altar pataman churarqan.

Jinan Abrahanqa cuchillota jap’irqan, chay ratupin Diospa angelnin janaq pachamanta nimurqan: “¡Abrahán! ¡Ama imanaypaschu wawaykita! Kunanqa  yachanin Diospi iñisqaykita, manan wawaykitapas jark’akurqankichu sacrificasqa kananmanta”, nispa. Chay ratupin Abrahanqa juj ovejata sach’a-sach’api mayt’usqata rikurqan, jinan Isaacpa rantinpi chay ovejata sacrificarqan.

Chay p’unchaymantapachan Jehová Diosqa Abrahanta nirqan: “Amigoymi kanki”, nispa. ¿Imarayku? Diosta tukuypi kasukusqanrayku, mayninpi manaña entiendeqchu chaypas.

Diosmi jujmanta Abrahanman prometerqan: “Bendecisqaykin, jinaspa askha wawakunayoq kapunki”, nispa. Chaywanqa nisharqan Abrahanpa familianwan Diosta serviq runakuna bendecisqa kanankutan.