Babel llaqtaq qayllanpin Ur sutiyoq llaqta karqan. Chaypi tiyaq runakunaqa waj dioskunatan adoraqku manan Jehová Diostachu. Juj runan ichaqa Jehová Diosta adorarqan, sutinmi karqan Abrahán.

Jehová Diosmi Abrahanta nirqan: “Wasiykita familiaykitawan saqepuspa rikuchisqay llaqtaman ripuy”, nispa. Diosmi prometellarqantaq: “Jatun nacionmanmi tukuchisqayki. Kasukusqayki jawan llapa nacionmanta runakuna allinkunata chaskinqaku”, nispa.

Abrahanqa manan yacharqanchu Jehová Dios mayman pusananta, chaywanpas Diospin confiarqan. Abrahanpas, esposan Sarapas, papan Tarepas, sobrinon Lotpas Diostan kasukurqanku. Cosasninkuta alistaspan viajayta qallarirqanku.

 Abrahán 75 watanpi kashaqtinmi paypas familianpas Jehová Diospa pusasqan llaqtaman chayarqanku. Chay llaqtaq sutinmi karqan Canaán. Chaypi kashaqtinmi Jehová Diosqa payman prometerqan: “Qhawarisqayki llapan kay jallp’atan wawaykikunaman qopusaq”, nispa. Abrahanwan Sarawanmi ichaqa kuraqña kasharqanku. Chhaynaqa, ¿imaynatan Jehová Dios junt’anman promesanta?