Moisesmi faraonta prometerqan manaña rikunanpaq. Manaraq ripushaspan ichaqa nirqan: “Kuska tutatan Egiptopi llapa familiamanta phiwi churikuna wañunqaku. Faraonpa wawanpas esclavokunaq wawanpas”, nispa.

Diosmi Israel runakunata nirqan: “Especial mijunatan preparankichis. Chaypaqmi juj watayoq orqo ovejata otaq orqo cabrata ñak’ankichis, yawarnintataq punkuq k’aspinkunaman ch’aqchunkichis. Aychantataq kankaspa mijunkichis mana levadurayoq t’antatawan. Liston kashankichis lloqsinaykichispaq. Kunan tutan Egiptomanta librasaykichis”, nispa. Imaynataraqchá kusikurqanku.

Kuska tutatan Diospa angelnin Egiptopi llapa wasikunaman rirqan. Yawarwan mana ch’aqchusqa wasikunapi kaq phiwi churikunan wañurqanku. Yawarwan ch’aqchusqa kaqkunapin ichaqa mana wañurqankuchu. Egipto llaqtapiqa llapa phiwi wawakunan wañurqanku. Israel runakunaqmi ichaqa mana jujpas wañurqanchu.

Faraonpa phiwi churinpas wañupurqanmi, chaymi faraonqa Moisesta Aarontawan nirqan: “¡Ripuychis kaymanta! ¡Jinaspa Diosniykichista adoramuychis! ¡Animalniykichistapas apaspa ripuychis!”, nispa.

Chay tutaqa junt’an killa kasharqan. Jinan Israel llaqtaqa familiakunapi  ayllukunapi juñunakuspanku Egiptomanta puririrqanku. 600.000 qharikunan karqanku, karqanmi ancha askha warmikunapas wawakunapas. Waj llaqtayoq runakunapas paykunawan kuskan ripurqanku Jehová Diosta adoranankupaq. ¡Libren kapurqanku!

Jehová Dios paykuna salvasqanta yuyarinankupaqmi sapa wata juj especial mijunata preparananku karqan, chaytan suticharqanku “Pascua Fiesta” nispa.