Egiptomanta iskay killa lloqsimpusqanku qhepamanmi Israel runakunaqa Sinaí orqoq chimpanpi samarqanku. Chaypin Diosqa Moisesta nirqan orqoman wichananpaq, chaypitaq payta nirqan: “Noqan Israel llaqtata salvarqani. Sichus kamachikuyniykunata kasukunqaku chayqa, llaqtaymi kanqaku”, nispa. Chaytan Moisesqa Israel runakunaman willarqan. ¿Imanispan kutichirqanku? Nirqankun: “Jehová Diospa llapa kamachisqantan kasukusaqku”, nispa.

Chay qhepamanmi Moisesqa jujmanta orqota wicharqan. Chaypin Diosqa payta nirqan: “Kinsa p’unchaymantan llaqtata rimaykusaq. Llapankuman willay Sinaí orqoman ama wichamunankupaq”, nispa. Jinan Moisesqa Israel runakunaman willarqan Diosta uyarinankupaq alistakunankuta.

Kinsa kaq p’unchaypin Israel runakunaqa rikurqanku llifllikachayta, yana phuyu orqota tapaykusqantapas. Uyarirqankun jatun t’ojayta, pututuq waqasqantapas. Jinan Jehová Diosqa orqoman uraykamurqan nina ukhupi. Israel runakunaqa sinchi manchasqan kasharqanku. Orqontinmi q’osñiwan tapasqa kasharqan, jallp’apas sinchitan chhafchikurqan. Pututuq waqasqanpas aswan fuertetan uyarikurqan. Jinan Jehová Diosqa nirqan: “Noqan Jehová Diosqa kani. Aman waj diostaqa adorankichu”, nispa.

Moisesmi jujmanta orqota wicharqan, chaypin Diosqa llaqtanpaq leykunata qomurqan. Chaypin willarqan Diosta imayna adorananku kasqanta, imaynata portakunanku kasqantapas. Moisesqa chaykunata qelqaspan Israel llaqtaman leerqan. Llapankun prometekurqanku: “Diospa llapa kamachisqantan kasukusaqku”, nispa. Ichaqa, ¿junt’arqankuchu prometekusqankuwan?