Canaán llaqtakunapi runakunan Jericó llaqtawan imachus pasasqanta yacharusqaku. Jinan chay llaqtakunamanta reykunaqa juñunakurqanku Israel contra maqanakunankupaq. Gabaón runakunan ichaqa mana chaytachu ruwarqanku. Aswanmi paykunaqa thanta p’achawan churakuspanku Josueman rispa nirqanku: “Karu llaqtamantan jamushayku. Uyariykun Jehová Dios qankunarayku Egiptota Moabtapas imachus ruwasqanta. Sichus prometewankiku mana wañuchiwanaykikupaq chayqa, qankunatan servisaykiku”, nispa.

Josueqa paykunata creespan prometerqan mana wañuchinankupaq. Kinsa p’unchay qhepamanmi ichaqa Josueqa yacharqan Gabaón runakuna mana karu llaqtamantachu kasqankuta. Chaymi Josueqa paykunata tapurqan: “¿Imaraykun llullakuwarqankiku?”, nispa. Paykunataq nirqanku: “Manchakurqaykun, yachaykun qankunarayku Jehová Dios maqanakusqanta, ama wañuchiwaykuchu”, nispa. Jinan Josueqa mana imanarqanpaschu.

Chay qhepallamanmi Canaanmanta pisqa reykuna juñukuspanku Gabaonwan maqanakuq rirqanku. Jinan Josueqa soldadonkunawan  tutantin purirqanku Gabaón runakunata salvanankupaq. Tutamantanmi maqanakuyta qallarirqanku. Jinan Canaán runakunaqa ayqekurqanku, Jehová Diosmi ichaqa jatunkaray chijchikunata paykuna pataman kachaykamurqan. Josuetaq Diosta valekurqan intita sayachinanpaq. Jinan intiqa mana kuyurirqanchu. Manan jayk’aqpas chay milagrotaqa rikukurqanchu, ichaqa tukuy sonqonwan Diospi confiasqanraykun Josueqa chayta mañakurqan. Chay p’unchayqa manan tutayarqanchu Israel runakuna enemigonkuta atipanankukama.