Moisesqa askha watakunañan Israel llaqtata pusarqan, kunanmi ichaqa wañupunanpaqña kasharqan. Diosmi payta nirqan: “Manan qanchu llaqtaytaqa prometesqay jallp’aman jaykuchinki. Chaywanpas rikuchisaykin chay jallp’ata”, nispa. Jinan Moisesqa Diosta valekurqan juj runata ajllananpaq, chaymi Jehová Diosqa Josueta ajllarqan Israel llaqtata pusarinanpaq.

Moisesmi llaqtata nirqan: “Wañupusaqñan, Jehová Diosmi Josueta ajllan prometesqan jallp’aman pusanasuykichispaq”, nispa. Josuetataq nirqan: “Ama manchakuychu, Diosmi yanapasunki”, nispa. Chay qhepallamanmi Moisesqa Nebo orqoman wicharqan. Chaymantapachan Diosqa rikuchirqan Abrahanman, Isaacman, Jacobmanpas prometesqan jallp’ata. Jinan Moisesqa 120 watanpi kashaspa wañupurqan.

Jehová Diosmi Josueta nirqan: “Jordán mayuta chimpaspa Canaanman jaykuy. Moisesta jinan yanapasayki. Sapa p’unchay kamachikuyniykunata leey. Ama manchakuychu, llapa kamachisqayta ruway”, nispa.

 Josuemi iskay qharikunata Jericó llaqtaman kacharqan qhawamunankupaq. Qatimuq willakuypin astawanraq chaymanta yachasun. Jericomanta kutimuspankun chay runakunaqa Josueman willarqanku Canaanman jaykunankupaq allin kashasqanta. Qhepantin p’unchaytaq Josueqa Israel runakunata kamachirqan alistakunankupaq. Ñaupaqtaqa Diospa rimanakuynin arcata q’epiq sacerdotekunatan kamachirqan mayuman jaykunankupaq. Mayuqa junt’an kasharqan, ichaqa sacerdotekunaq chakin unuta saruyta qallariqtinkun unuqa ch’akipurqan. Jinan sacerdotekunaqa mayuq chaupinkama rirqanku, chaypitaq sayarqanku llapa Israel runakuna chimpanankukama. Chay milagrota rikuspa, ¿yuyarinkumanchu Israel runakuna karqan Jehová Dios Puka lamar-qochapi milagro ruwasqanta?

Chay qhepamanmi Israel runakunaqa Diospa prometesqan jallp’aman jaykurqanku. Chaypiqa atirqankun wasinku ruwakuyta, chajrakunatapas llank’ayta. Chay jallp’apiqa askhan mijuykuna kaq, chaymi niqku “lecheyoq mielniyoq jallp’a” nispa.