Israel qharikunan Jericó llaqtata qhawaq rirqanku, jinaspa Rahabpa wasinpi qhepakurqanku. Chayta yacharuspan Jericó llaqtamanta reyqa soldadokunata kacharqan Rahabpa wasinman. Rahabtaq qhawaqkunata wasiq techonpi pakaruspa soldadokunata nirqan: “Manan kaypiñachu kanku juj ladota maskhamuychis”, nispa. Jinan Rahabqa qhawaqkunata nirqan: “Qankunawanmi Jehová Diosqa kashan, chaymi kay jallp’ata jap’ikapunkichis. Ama jinachu, familiaytawan salvaykuwaychis”, nispa.

Llaqta qhawaqkunan Rahabta nirqanku: “Sichus puka waskhata ventanaykipi warkunki chayqa, manan wasiyki ukhupi kaqkunaqa wañuchisqachu kanqa”, nispa.

Rahabqa waskhawanmi ventananta qhawaqkunata uraykachirqan llaqtamanta lloqsinankupaq. Qhawaqkunaqa kinsa p’unchaymi orqopi pakakurqanku, chay qhepamanmi Josuepa kasqanman kutirqanku. Chaymantan Israel runakunaqa Jordán mayuta chimpaspa preparakurqanku Jericó llaqtata jap’ikapunankupaq.  Jehová Diosmi kamachirqan p’unchaypi juj kutita llaqtata muyurinankupaq. Soqta p’unchaymi chayta ruwarqanku, qanchis kaq p’unchaypin ichaqa qanchis kutita muyurirqanku. Chaymantan sacerdotekunaqa trompetata tocarqanku Israel soldadokunataq kallpawan qaparirqanku. Jinan llaqtata muyuriq perqakunaqa thunikurqan. Rahabpa wasinpas llaqtata muyuriq perqapin kasharqan, wasinmi ichaqa mana urmaykurqanchu. Rahabpas familianpas Jehová Diospi confiasqankuraykun salvakurqanku.