Saulpa wañupusqan qhepamanmi Davidqa 30 watanpi Israelpi rey karqan. Unayta kamachikushaqtinmi, juj tuta palacionpa techonpi kashaqtin sumaq rijch’ayniyoq warmita rikurusqa. Davidqa yacharusqan sutin Bat-Seba kasqanta, payqa Uriaspa esposanmi karqan. Jinaspa Bat-Sebata wajachimuspa paywan puñurqan, jinan warmiqa onqoq rijurirqan. Davidqa juchallikusqanta pakananpaqmi ejercitonpi umalliqta kamachirqan, Uriasta guerrapi ñaupaqman churaspa paymanta ayqerikunankupaq. Jinan Uriasqa guerrapi wañupurqan, chay qhepamantaq Davidqa Bat-Sebawan casarakurqan.

Diosqa rikumusharqanmi chaykuna pasasqanta, chhaynaqa, ¿imatan ruwarqan? Profeta Natantan kacharqan Davidwan rimamunanpaq. Natanmi nirqan: “Juj qhapaq runan askha ovejakunayoq karqan, juj wajchataq ancha munakusqan juj ovejallayoq karqan. Jinan chay qhapaqqa wajchaq ovejanta qechurapurqan”, nispa. Davidtaq sinchita phiñakuspa nirqan: “¡Chay qhapaq runaqa wañunanmi!”, nispa. Natantaq nirqan: “¡Qanmi chay qhapaq runa jina kanki!”, nispa. Davidqa sinchita llakikuspan Natanta nirqan: “Dios contran juchallikuni”, nispa. Chay juchanmantan Davidpas familianpas problemakunapi rikukurqanku. Jehová Diosqa castigarqanmi Davidta, ichaqa manan wañuchirqanchu juchanmanta pesapakusqanrayku.

Davidqa Jehová Diospaqmi templota ruwayta munarqan, Diosmi ichaqa wawan Salomonta ajllarqan ruwananpaq. Jinan Davidqa  imaymana cosaskunata alistarqan, piensarqantaq: “Jehová Diospa templonqa ancha sumaqmi kanan, wawayqa waynallaraqmi, chaymi imaymanata alistapusaq”, nispa. Davidqa qolqentan qorqan, allin llank’aqkunatan maskharqan, qoritapas qolqetapas juñurqanmi. Tiro, Sidón llaqtakunamantataq maderata apachimurqan. Wañupunanpaqña kashaqtinmi Salomonman planota qorqan templota ruwananpaq, nirqantaq: “Diosmi kay planota qowan, paymi yanapasunki, mana manchakuspan ruwanayki”, nispa.