Salomón Diosta adorasqan tiempopiqa runakunaqa thajpin kausarqanku. Salomonmi ichaqa waj nacionmanta askha warmikunawan casarakurqan, chay warmikunaqa idolokunatan adorarqanku. Jinan Salomonqa idolokunata adorarqan. Jehová Diosqa phiñakurqanmi, jinan payta nirqan: “Israel llaqtatan iskayman t’aqasaq, mirayniykimanmi juch’uy partellata qosaq, jatun partetataq jujnin kamachiykiman qosaq”, nispa.

Salomonpa jujnin kamachinpa sutinmi karqan Jeroboán, payqa viajashaspan profeta Aiyawan tuparqan. Chay profetan capanta 12 pedazokunaman llik’irqan. Jinaspa nirqan: “Jehová Diosmi Israel llaqtata iskayman t’aqanqa. Chunka pedazota ajllakuy, qanmi chunka aylluta kamachinki”, nispa. Chayta yacharuspan Salomonqa Jeroboanta wañuchiyta munarqan. Jinan Jeroboanqa Egiptoman ayqekurqan. Tiempowanmi Salomonqa wañupurqan, wawan Rehoboamtaq kamachikuyta qallarirqan. Chaymi Jeroboanqa Israel llaqtaman kutimurqan.

Israelpi umallikunan Rehoboamta nirqanku: “Sichus llaqtata allinta tratanki chayqa, servisunkikun”, nispa. Wayna amigonkunataq  nirqanku: “Ama khuyapayaspa llaqtata kamachiy”, nispa. Rehoboamqa chay waynakunata kasuspan runakunata millayta tratarqan. Jinan llaqtaqa pay contra jatarispa Jeroboanta churarqanku chunka ayllukunata kamachinanpaq. Chay chunka ayllukunatan suticharqanku “Israel llaqta” nispa, iskay ayllukunatataq “Judá llaqta” nispa. Jinan Rehoboamqa chay iskay ayllukunata kamachirqan. Chhaynapin Israelpi 12 ayllukunaqa iskayman t’aqasqa karqan.

Jerusalén llaqtaqa Judá llaqtapin tarikurqan. Jeroboanqa manan munarqanchu runakuna Diosta adoraq Jerusalenman rinankuta. Payqa nirqanmi: “Rehoboamtan kasukapunqaku”, nispa. Jinan iskay qori torillokunata ruwachispa nirqan: “Jerusalenman riyqa sasan. Aswanpas kaypi qhepakuychis iskay qori torillokunata adoraspa”, nispa. Chaymi runakunaqa Jehová Dios serviyta qonqapurqanku.