APOCALIPSIS libron willan sumaq suyakuymanta. Chay librotaqa apóstol Juanmi qelqarqan. Willanmi rikhuriykunapi Juanpa rikusqan profeciakunamanta, tukuypitaq Diospa munaynin imayna hunt’akunanmanta.

Ñawpaq rikhuriypin, kawsarimpuq Cristo iñiq t’aqakunata kallpacharqan wakintataq anyarqan. Huk rikhuriypin willan Diospa tiyananmanta, chaypi angelkuna yupaychasqankumantawan.

Diospa munaynin hunt’akusqanman hinan Jesucristo chaskirqan huk k’uyuta qanchis sellowan sellosqata. Tawa sellokunata kichaqtinmi lloqsimurqan sillaykusqakama tawa caballokuna. Yuraq caballopi sillakuqqa Jesusmi karqan, chaymi tupan rey kananpaq coronasqa kasqanwan. Hukkunan tupan guerrawan, yarqaywan, onqoywan ima. Chaykunan rikukunan karqan millay runakuna tukukunanpaq qayllaykamushaqtin. Qanchiskaq sellota kichaqtinmi qanchis kutita trompetata tocarqanku Diospa juicionkunamanta yachakunanpaq. Tocasqanku qhepamanmi qanchis ñak’ariykuna kallarqantaq.

Qhepamanmi Juan rikurqan huk wawaq nacesqanta, chayqa tupan hanaq pachapi Diospa Gobiernon takyachisqa kasqanwanmi. Hanaq pachapin maqanakuy karqan, chaypin Satanás supaykunantin kay Hallp’aman wikch’uykamusqa karqanku. Chayllamanmi huk kunka uyarikurqan: “¡Ay, imaynaraqmi kankichis kay pachapi [...] tiyaqkuna!” niqta. ¿Imaraykun chayta nirqan? Saqra pisillaña tiempon kasqanta yachaspa sinchi phiñasqa kasqanrayku (Apocalipsis 12:12).

Juanmi hanaq pachapi Jesusta rikullarqantaq corderoman rikch’akuqta, qayllanpitaqmi kasharqanku 144.000 akllasqa runakuna ‘Cristowan [...] kamachikunankupaq’. Apocalipsis libron willan chay 144.000 runakunapas prometesqa miraypi tarikusqankuta (Apocalipsis 14:1; 20:6).

Qhepamanmi Hallp’api kamachikuqkuna huñukunqaku Armagedón p’unchaypaq otaq ‘Diospa hatun taripay p’unchayninpi hatun maqanakuypaq’. Paykunan Jesucristowan espiritual ejercitonwan ima maqanakunqaku. ¿Pikunan atipanqaku? Jesusmi ejercitonpiwan chay kamachikuqkunata wañuchinqa, Satanastataq chinkay-chinkay ukhupi wisq’anqa. Jesusqa 144.000 runakunapiwanmi waranqa wata kay Hallp’ata kamachimunqaku, waranqa wata tukuypitaqmi Satanaspas wañuchisqa kanqa (Apocalipsis 16:14; 20:4).

¿Imatan Cristo ruwanqa kasukuqkunapaq? Juanmi qelqarqan: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu, ñawpaqkaqkunaqa manaña kapusqanrayku”, nispa (Apocalipsis 21:4). ¡Arí, yapamantan Hallp’anchis sumaq paraisoman tukupunqa!

Chhaynatan Apocalipsis libro Bibliaq yachachisqanmanta willayta tukun. Arí, Cristo kamachikamuqtinmi Jehová Dios sutinta ch’uyanchanqa, llapa runakunataqmi yachanqaku paylla Kamachikuq kasqanta.

(Apocalipsis.)