1. ¿Ima rayku Etiopía suyumanta kamachikuqpa tesoreron bautizakuyta munaran?

“KAYPIN unu kashan, ¿manachu bautizasqa kayta atiyman?”, chaytan niran apostolkunaq tiemponpi Etiopía suyumanta kamachikuqpa tesoreron. Felipe sutiyoq cristianon Bibliawan yachachiran Jesús Mesías kasqanta. Muspharisqaraqmi yachasqanmanta, chaymi bautizakuyta munaran (Hechos 8:26-36).

2. ¿Ima rayku bautizakuypi yuyaykunaykiña?

 ² Sichus Jehová Diospa testigonwan kay librota qallariymantapacha estudiarankiña chayqa kaytapaschá tapukushanki: “¿Manachu bautizasqa kayta atiyman?” nispa. Yachankiñan Paraisopi runakuna wiñayta kawsanankupaq Bibliaq prometesqanta (Lucas 23:43; Apocalipsis 21:3, 4). Yachallankitaqmi wañupuqkuna imaynapi tarikusqanta, kawsariymanta suyakuytapas (Eclesiastés 9:5; Juan 5:28, 29). Ñapaschá Jehová Diospa testigonkunaq huñunakuyninkunapi huñunakushankiña, repararankitaqchá cheqaq religión kasqankutapas (Juan 13:35). Hinaspapas ñapaschá Jehová Dioswanpas hukllachakushankiña.

3. a) ¿Imatan Jesús qatikuqninkunaman kamachiran? b) ¿Imaynatan cristianokuna bautizanku?

³ ¿Imaynatan rikuchiwaq Diospa munaynin ruway munasqaykita? Jesusmi qatikuqninkunata kamachiran: “Rispa llapa suyu runakunata yachachimuychis, [...] bautizamuychis”, nispa (Mateo 28:19). Jesusqa Bautizakusqanwanmi rikuchiran bautizakunanchista. Ichaqa manan Jesustaqa umallanpichu unuwan ch’allaykuranku nitaq hich’aykullarankuchu (Mateo 3:16). Griego simipi bautizay simiqa “unuman chinkaykuy” ninanmi. Chaymi cristianokunaqa bautizakuqta unuman chinkaykachispa bautizanku.

4. ¿Imatan rikuchinchis bautizakuspa?

⁴ Jehová Dioswan hukllachakuyta munaqkunaqa bautizakunankun. Bautizakuspaqa lliwmanmi rikuchinki Diospa munaynin ruway munasqaykita, munayninta ruwaspa kusikusqaykitapas (Salmo 40:7, 8). Bautizakunapaqqa qatimuq parrafokunapin yachasun imachus ruwananchista.

5. a) ¿Imatan ñawpaqta ruwana bautizakunapaq? b) ¿Ima rayku huñunakuykunaman rishanallayki?

⁵ Bautizakunapaq ñawpaqkaq ruwaytaqa hunt’ashankiñan.  ¿Imaynata? Bibliamanta estudio chaskisqaykipi Jehová Diosmanta Jesucristomantawan yachaspa (leey Juan 17:3). Ichaqa astawanraqmi yachawaq. Cristianokunan munanku Diospa ‘munayninta allintapuni reqsinaykichista’ (Colosenses 1:9). Chaypaqqa Jehová Diospa testigonkunaq huñunakuyninmi yanapasunki. Chay rayku huñunakuykunamanqa rishanallayki (Hebreos 10:24, 25). Huñunakuykunaman rishallanki chayqa Diosmantan astawan yachanki.

6. ¿Imakunatan Bibliamanta yachanayki bautizakunaykipaq?

⁶ Bautizakunaykipaqqa manan Bibliaq llapa yachachisqantaraqchu yachanayki. Yuyariy, Etiopía suyumanta kamachikuqpa tesoreron Bibliamanta yacharan chaypas, yanapanataraqmi necesitaran astawan yachananpaq (Hechos 8:30, 31). Qanpas astawanraqmi yachanayki. Hinaspapas manan hayk’aqpas tukukunqachu Diosmanta yachanaykiqa (Eclesiastés 3:11). Bautizakunaykipaqqa yachanaykin Bibliamanta qallariy yachachikuykunata, chaykunapitaq iñinayki (Hebreos 5:12). Yachanaykin imaynapi wañupuqkuna tarikusqanta, ima rayku Diospa sutinpas Reinonpas ancha allinpuni kasqantawan.

7. Bibliata estudiasqaykiman hina, ¿iman sonqoykipi wiñanan?

⁷ Ichaqa manan yachayllachu yachana, ‘mana iñiyniyoq kaspaqa manan Diospa sonqonman chayaqtapuni ruwayta atisunmanchu’ (Hebreos 11:6). Biblian willan Corinto llaqtapi wakin runakunaq ruwasqanta: cristianokunaq predicasqanta uyarispan “iñirqanku, hinaspan bautizachikurqanku” (Hechos 18:8). Chhaynatapaschá qanpas ruwanki. Bibliata estudiaspaqa iñinaykin Biblia Diospa yuyaychasqan kasqanpi. Iñinallaykitaqmi Diospa promesankuna hunt’akunanpi, Jesucristoq sacrificakusqanwan qespichisqa kanaykipipas (Josué 23:14; Hechos 4:12; 2 Timoteo 3:16, 17).

8. ¿Iman tanqasunki yachasqaykimanta willanaykipaq?

⁸ Iñiyniykiq wiñasqanmi tanqasunki yachasqaykimanta willanaykipaq (Jeremías 20:9). Arí, qanllamantan, Diosmanta munayninmantawan willanki (leey 2 Corintios 4:13).

9, 10. a) ¿Ñawpaqtaqa pikunamanmi Bibliamanta yachasqaykita willawaq? b) Sichus Jehová Diospa testigonkunawan kuska predicayta munanki chayqa, ¿imatan ruwanayki?

⁹ Ñawpaqtaqa sumaqllata willariy familiaykikunaman, amigoykikunaman, wasimasiykikunaman, llank’aqmasiykikunamanpas. Qhepamanqa munankipaschá Jehová Diospa testigonkunawan kuska predicayta. Chhayna kaqtinqa Bibliamanta yachachiqniykiman willay. Predicanaykipaq hinaña kasqaykita reparanqa chayqa, iskayniykichismi iskay ancianokunawan huñunakunkichis rimanaykichispaq.

¹⁰ Chhaynapin astawan reqsinki Diospa llaqtanpi michiq wakin ancianokunata (Hechos 20:28; 1 Pedro 5:2, 3). Paykunan qhawarinqaku maykaman Bibliamanta qallariy yachachikuykunata entiendeshanki, chaypi iñishankichus manachus chayta, chayman hinachus kawsashanki, cheqaqtapunichus Jehová Diospa testigon kayta munashanki chaytapas. Chaykunata hunt’ashanki chayqa willasunkikun mana bautizasqa publicador kanaykipaq, chayraqmi Jehová Diospa testigonkunawan kuska predicawaq.

11. ¿Ima ruwaykunamantan karunchakunanku publicador kayta munaqkuna?

¹¹ Mayninqa ancianokunaq qhawarisqanman hina, manapasraqchá wakinqa kawsayninkuta t’ikrankuraqchu publicador kanankupaq. Yaqapaschá pakallapi mana allin ruwasqantaraq saqepunan. Chay rayku publicador kanaykipaqqa karunchakunaykin kay hatun huchakunamanta: qhelli hucha kawsaymanta, machaymanta, drogakuymantawan (leey 1 Corintios 6:9, 10; Gálatas 5:19-21).

12. ¿Ima rayku khuyayta llakipakunanchis huchapi kawsasqanchismanta?

¹² Bautizakunapaqqa huk ruwaykunatawanmi hunt’anayki. Apóstol Pedro niran: “Huchaykichista saqepuspa [otaq huchaykichismanta khuyayta llakipakuspa] Diosman kutirikuychis huchaykichiskuna pichasqa kananpaq”, nispa (Hechos 3:19). Huchallikusqanmanta khuyayta llakikuqqa cheqaqtapunin nanachikun huchapi kawsasqanmanta. Ichaqa manan hatun huchapi kawsaqkunallachu llakipakunanku, pisi huchapi kawsaqkunapas llakipakunankun. ¿Ima rayku? Llapa runakuna huchayoq kasqanchis rayku, Diospa panpachaynintapas necesitasqanchis rayku (Romanos 3:23; 5:12). Manaraq Bibliata estudiashaspaqa manan yacharankichu Diospa munayninmanta. Chay rayku mana Diospa munasqanman hinachu kawsaranki, ¿riki? Chay rayku llakipakunanchispuni huchapi kawsasqanchismantaqa.

13. ¿Iman kutirikuy?

¹³ Huchapi kawsasqaykimanta khuyayta llakipakusqayki qhepamanqa kutirikunaykin. Kutirikuspaqa ñawpaq kawsayniykimantan ‘kutirikushanki’. Chayqa manan huchapi kawsasqaykimanta llakikuyllachu, aswanqa ñawpaq kawsasqaykita saqepuymi. Chaymantapachan kallpachakunayki allin kaqllata ruwanaykipaq. Arí, bautizakunaykipaqqa huchapi kawsasqaykimanta khuyayta llakikunayki kutirikunaykitaq.

14. ¿Imatawanmi ruwanayki manaraq bautizakushaspa?

¹⁴ Manaraq bautizakushaspaqa kaytawanmi ruwanayki: Jehová Diosman qokunayki.

15, 16. ¿Iman Diosman qokuy, iman kallpachawasun payman qokunanchispaq?

¹⁵ Qokuyqa, tukuy sonqowan Jehová Diosmanta mañakuymi,  chay mañakuypin prometenchis payllapaqña kawsanata. ¿Ima raykun chhaynata comprometekuna? Kaypi yuyaykuy, huk qhari huk warmita nin: astawan reqsiyta munayki, nispa. Payta astawan reqsispa, sumaq kayninkunatawan reparaspan astawan payman k’askakunqa. Chhayna kaqtinqa casarakunankupaqña rimapayanqa. Casarakuspaqa astawanmi imaymana ruwanayoq rikukunqa. Ichaqa chay warmita munakuyninmi kallpachanqa chay compromisota ruwananpaq.

¹⁶ Jehová Diosta reqsisqanchiswan munakusqanchispiwanmi kallpachawanchis payllapaqña kawsananchispaq payllata yupaychananchispaqpas. Jesucristota qatikuyta munaqqa ‘pay kikintan negakunan’ (Marcos 8:34). Negakunapaqqa Diostan ñawpaqta kasukunanchis ima munasqanchistapas qhepaman churaspa. Chaymi manaraq bautizakushaspa Diospa munaynintaraq ñawpaqman churanayki (leey 1 Pedro 4:2).

17. ¿Ima raykun wakin runakuna mana Diosman qokunkuchu?

¹⁷ Wakin runakunaqa manchakunkun Jehová Diosman qokuyta hatun compromisota hina rikusqanku rayku. Manchakunkupaschá qokusqankuwan mana hunt’aqtinku Diosman cuenta qonankumanta. Yuyaykunkun, yaqapaschá huchallikuyman hinaspa Jehová Diosta phiñachiyman, aswanpas ama Diosman qokusaqchu, nispa.

18. ¿Iman kallpachasunki Jehová Diosman qokunaykipaq?

¹⁸ Jehová Diosta astawan munakusqaykin kallpachasunki payman qokunaykipaq, qokusqaykiman hina kawsanaykipaqpas (Eclesiastés 5:4). Qokusqayki qhepamanqa ‘Señorpa kaqkuna hinapunichá purinki’ (Colosenses 1:10). Diosta munakunki chayqa manan sasachu kanqa paypa munayninta hunt’anaykipaq. Apóstol Juan hinapaschá yuyaykunki: “Diosta munakuspanchisqa kamachikusqankunatan kasukunchis, kamachikuyninkunaqa manataqmi  sinchi sasachu”, nispa (1 Juan 5:3).

19. ¿Ima rayku mana manchakunachu Diosman qokuyta?

¹⁹ Jehová Diosqa manan ch’uya kanataraqchu suyan payman qokunapaq. Payqa yachanmi ima atisqanchista mana atisqanchistapas, atisqanchisman hinallataqmi imatapas kamachiwanchis (Salmo 103:14). Payqa allin kanaykita munaspan yanapasunki (leey Isaías 41:10). Jehová Diosmanta tukuy sonqoykiwan hap’ipakunki chayqa, “cheqan ñanninta pusasunki” (Proverbios 3:5, 6).

20. ¿Imatawanmi ruwananku Diosman qokuqkuna?

²⁰ Kaypi yachasqanchisman hina, yaqapaschá Jehová  Diosman qokuyta munashankiña. Ichaqa Diosta cheqaqtapuni munakuqkunaqa kaytawanraqmi ruwananku: ‘siminkuwanmi reqsini ninanku qespichisqa kanankupaq’ (Romanos 10:10, Mosoq Rimanakuy). ¿Imaynata chayta ruwana?

21, 22. ¿Imaynatan ‘simiykiwan’ rikuchiwaq Diosman qokusqaykita?

²¹ Congregacionpi umallikunaq llank’ayninpi yanapaq  umalliman willay bautizakuy munasqaykita. Paymi huk ancianokunata ninqa Bibliamanta qallariy yachachikuykunata tapunasuykipaq. Chay ancianokunaq qhawarisqanman hina bautizakunapaq ruwaykunata hunt’ashankiña chayqa, nisunkikun hamuq asambleapi bautizakunaykipaq. * Bautizakuna p’unchaypiqa bautizakuqkunapaq discurso qosqankupin yachachinku iman bautismo kasqanta. Discursantetaq discurso tukuypi bautizakuqkunaman iskay tapuykunata tapun, paykunataq allin kunkawan kutichinku. Chhaynapin ‘siminkuwan’ rikuchinku iñisqankuta.

²² Bautizakuspan lliwman rikuchinki Diosman qokusqaykita, chaymantapacha Jehová Diospa testigon kasqaykitapas. Jehová Diosman qokusqankuta llapa runakuna yachanankupaqmi bautizakuqkunata unuman chinkaykachinku.

23. ¿Ima ninanmi “Yayaq, Churiq, santo espirituq sutinpi” bautizakuy?

²³ Jesusmi qatikuqninkunata niran “Yayaq, Churiq, santo espirituq sutinpi” bautizakunankupaq (Mateo 28:19). Yayaq, Churiq sutinpi bautizakuyqa Jehová Diosta Jesucristotawan kamachikuq kasqankuta reqsiymi (Salmo 83:18; Mateo 28:18). Santo espirituq sutinpi bautizakuypas Diospa kallpan kasqanta reqsiymi, chay kallpawan tukuy ruwasqantapas (Gálatas 5:22, 23; 2 Pedro 1:21).

24, 25. a) ¿Imamanmi rikch’akun bautismo? b) ¿Ima tapuytan kutichisun?

²⁴ Bautizakuyqa manan unupi chinkaykachisqa kayllachu. Huk importante ruwaymanmi rikch’akun. Unuman chinkaykachisqa kasqaykiqa “wañupushawaqpas” hinan kanqa, chaytaqmi rikch’akun ñawpa kawsasqaykita saqepusqaykiman.  Unumanta llosisqaykitaq rikuchinqa Diospa munaynin ruwanallaykipaqña kawsanaykita. Manan llank’aymanchu, ima ruwaymanchu, runamanchu, nitaq llaqtanmanchu qokushanki, aswanpas Jehová Diosmanmi, chaytaqa manan hayk’aqpas qonqanaykichu. Qokusqaykiwan bautizakusqaykipiwanmi Jehová Dioswan sonqota tupachinki (Salmo 25:14).

²⁵ Manan bautizakuspallachu qespichisqa kanki. Apóstol Pablo qelqaran: “Diospaq tukuy sonqo llank’aychis manchakuywan khatatataywan, qespisqa kasqaykichispi wiñanaykichispaq”, nispa (Filipenses 2:12). Bautismoqa qallariyllan. Ichaqa kanmi huk tapukuy: ¿imatan ruwashanallanchis Dioswan hukllachasqa kanapaq, munakuyninpi takyananchispaqpas? Hamuq capitulopin chaymanta yachasun.