1, 2. ¿Ima raykun ancha sumaqta qhawarina mañakuyta, ima raykun mañakuymanta Bibliaq nisqanta yachananchis?

HANAQ PACHAPI Diospa lliw kamasqanmantaqa Hallp’an aswan huch’uycha. “Hanaq pachatapas kay pachatapas Kamaq” Jehová Diospaqqa baldemanta unu sut’uy hinallan suyukunaqa (Salmo 115:15; Isaías 40:15). Biblian ichaqa nin: “Señor Diosqa llapa waqyakuqninkunaq sispallanpin kashan, hayk’an cheqaq sonqowan waqyakuqninkunaq qayllallanpin kashan. Manchakuqninkunaq munasqantan hunt’an”, nispa (Salmo 145:18, 19). Yuyaykuy chay textoq nisqanpi. Tukuy-atiyniyoq Kamaqmi sispallanchispi kashan, ‘cheqaq sonqowan waqyakuqkunaq’ mañakusqankutapas uyarinmi. ¡Ancha sumaqmi Diosmanta mañakuyqa!

² Jehová Dios uyariwananchispaqqa munasqanman hinan mañakunanchis. Ichaqa, ¿imaynatan mañakusunman mañakuymanta Bibliaq nisqanta mana yachaspa? Yachananchispunin imayna mañakuyta, chaymi Jehová Diosman asuykachiwasun.

3. ¿Ima rayku Jehová Diosmanta mañakunanchis?

³ Jehová Diosmi mink’awanchis mañakunanchispaq.  Simin Qelqa nin: “Ama imamantapas llakikuychischu, aswanpas tukuy ima necesitasqaykichistapas Diosmanta mañakuychis, rogakuywan mañakuspaykichistaq Diosman graciasta qoychis. Hinan Diosqa thak-kayta qosunkichis runakunaq mana aypay atisqan thak-kayta, chay hinapin sonqoykichistapas yuyayniykichistapas Jesucristopi Diosqa waqaychanqa”, nispa (Filipenses 4:6, 7). Tukuy Kamachikuqpa mink’aynintaqa manapunichá pisichasunmanchu.

4. ¿Ima rayku Jehová Diosmanta sapa kutilla mañakuy payman astawan asuykachiwasunman?

⁴ Hinaspapas sapa kutilla Jehová Diosmanta mañakusun chayqa astawanmi payman asuykusun. Cheqaq amigokunaqa manan imata necesitaspallachu rimanakunku, aswanmi imayna kasqankupi interesakuspa sapa kutilla rimanakunku. Amigo kayninkutaqa wiñachinku yuyaykusqankuta, llakikusqankuta, ima sientesqankutapas sut’ita willarinakuspan. Chay hinallataqmi Jehová Dioswanpas. Kay libroq yanapayninwanmi yachankiña imatan Biblia yachachin Jehová Diosmanta, sumaq kayninmanta, munayninmantawan. Allintañan Diosta  reqsinki. Mañakusqaykipin hanaq pachapi kaq Taytaykiman willakuwaq yuyaykusqaykita ima sientesqaykitapas. Chhaynapin payman astawan asuykunki (Santiago 4:8).

5. Jehová Diosqa manan llapa runakunaq mañakusqankutachu uyarin, ¿imaynapin chayta yachanchis?

⁵ ¿Uyarinchu Jehová Dios llapa runakunaq mañakusqanta? Isaiaspa tiemponpi mana kasukuq israelitakunatan niran: “Makiykichista mast’arispa mañakuwaqtiykichispas manan qhawarimusqaykichischu, anchataña mañakuwaqtiykichispas, manan uyarisqaykichischu. Qankunaqa runa wañuchiqkunan kankichis”, nispa (Isaías 1:15). Sichus Diosta mana kasukusunchu chayqa manan uyarinqachu mañakusqanchista. Uyariwananchispaqqa kamachikusqantan kasukuna.

6. ¿Iman ñoqanchispi kanan mañakusqanchista Dios uyarinanpaq, imaynatan chayta rikuchisunman?

⁶ Ñawpaqtaqa iñiyniyoqmi kananchis (leey Marcos 11:24). Apóstol Pablo qelqaran: “Pipas mana iñiyniyoq kaspaqa manan Diospa sonqonman chayaqtapuni ruwayta atinmanchu. Chhaynaqa, pipas Diosman asuykuqqa iñinanpunin Diospa kasqanta, Diosqa maskhaqninkunata saminchaq kasqantapas”, nispa (Hebreos 11:6). Ichaqa cheqaq iñiyniyoq kanapaqqa manan Diospa kasqallantachu yachananchis nitaq mañakuykuna kutichisqallantachu yachananchis. Iñiytaqa ruwaywanmi rikuchikun. Iñisqanchisqa kawsasqanchispin sut’itapuni reparakunan (Santiago 2:26).

7. a) ¿Ima rayku respetowan Jehová Diosmanta mañakunanchis? b) ¿Imaynatan rikuchisunman k’umuykukuq kasqanchista tukuy sonqowan mañakusqanchistapas?

⁷ Chaymantapas Jehová Dios uyariwananchispaqqa k’umuykukuqmi kana tukuy sonqomantataq mañakunapas.  ¿Manachu Diosmanta yachasqanchis tanqawanchis k’umuykukuspa paywan rimanapaq? Pi kamachikuqwanpas rimaspaqa respetowanmi runakuna rimanku kamachikuq kasqan rayku. Chay rayku Jehová Dioswan rimaspaqa aswan respetowanraq rimananchis (Salmo 138:6). Paymi “Tukuy-atiyniyoq Diosqa” (Génesis 17:1). Paywan rimaspaqa anchatan huch’uyaykukunanchis. Chaymi tanqawasun tukuy sonqomanta mañakunapaq, sapa kuti mana kaqllata mañakunapaqpas (Mateo 6:7, 8).

8. ¿Imatan ruwana mañakusqanchisman hina?

⁸ Hinaspapas Dios uyariwananchispaqqa mañakusqanchisman hinan imatapas ruwana. Sichus Jehová Diosmanta mañakunchis “t’antaykuta qowayku”, nispa chayqa, kallpachakunanchismi atisqanchisman hina ima llank’aypipas allinta llank’ananchispaq (Mateo 6:11; 2 Tesalonicenses 3:10). Ima hucha atipanapaqpas mañakunchis chayqa, chay huchaman tanqaq ruwaykunamantan karunchakunanchis (Colosenses 3:5). Yacharunchisña ima kamachikuykunata hunt’ana mañakunapaq, kunanqa mañakuymanta huk tapuykunata kutichisun.

9. ¿Pimantan mañakunanchis, piqpa sutinpi?

⁹ ¿Pimanta mañakunanchis? Jesusmi qatikuqninkunata khayna mañakuyta yachachiran: “Yayayku hanaq pachapi kaq”, nispa (Mateo 6:9). Chay rayku Jehová Diosllamanta mañakunanchis. Ichaqa Diosmi munan Churin Jesucristo pi kasqanta reqsinanchista. Jehová Diosmi Jesusta kay Hallp’aman kachamuran huchamanta wañuymantawan kacharichiwananchispaq, chaytan 5 capitulopi yacharanchisña (Juan 3:16; Romanos 5:12). Hinaspapas paytan churan Uma Sacerdote kananpaq Juez kananpaqpas (Juan 5:22; Hebreos 6:20). Chay  rayku Biblia yachachin Jesuspa sutinpi mañakunanchista. Paypunin niran: “Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa”, nispa (Juan 14:6). Jehová Dios uyariwananchispaqqa payllamantan mañakunanchis Churinpa sutinpi.

10. ¿Imayna mañakuymi aswan chaniyoq kanman?

¹⁰ ¿Imaynata mañakunanchis? Jehová Diosqa manan kamachinchu imaynanmanta mañakunanchista. Ichaqa Biblian yachachin imayna mañakunata. Mañakusunmanmi tiyaspa, k’umuykuspa, qonqorikuspa, otaq sayaspapas (1 Crónicas 17:16; Nehemías 8:6; Daniel 6:10). Imaynanmantapas mañakusunmanmi ichaqa sonqomanta mañakuymi aswan chaniyoqqa. Sonqonchis ukhullapipas mañakusunmanmi, imataña ruwashaspapas sasachakuypiña tarikuspapas. Manapaschá pipas reparanchu mañakusqanchista, Jehová Diosmi ichaqa uyariwashanchis (Nehemías 2:1-6).

11. ¿Imakunapaqmi mañakusunman?

¹¹ ¿Imakunapaqmi mañakusunman? Biblia kutichin: ‘Munayninman hina imatapas Diosmanta mañakuqtinchisqa payqa uyariwasunmi’, nispa (1 Juan 5:14). Diospa munayninman hina kaqtinqa imatapas mañakusunmanmi. ¿Munanchu llakikuyninchiskunamanta willananchista? ¡Arí, munanmi! Jehová Diosmanta mañakuyqa munakusqanchis amigowan rimay hinan. ‘Sonqonchistan payman mast’arina’ lliw sientesqanchista sut’ita willakuspa (Salmo 62:8). Santo espirituntapas mañakusunmanmi allin kaq ruwayta yanapawananchispaq (Lucas 11:13). Hinaspapas imata ruwanapaqpas yachayta mañakunanchis, sasachakuykuna aguantanapaq kallpachawananchistapas (Santiago 1:5). Huchallikuspapas Jesuspa sacrificakusqanpi iñisqanchis raykun tukuy sonqomanta panpachayninta mañakunanchis (Efesios 1:3, 7). Ichaqa manan ñoqallanchispaqchu mañakunanchis,  mañakullasunmantaqmi familianchispaq, cristianomasinchiskunapaqpas (Hechos 12:5; Colosenses 4:12).

12. Jehová Diospa munaynin ñawpaqpi kasqanta rikuchinapaq, ¿imamantaraqmi mañakunanchis?

¹² Mañakuyninchispiqa Jehová Diospa munayninmi ñawpaqpi kanan. Hatunchananchismi imaymana ruwasqanmanta agradecekunanchistaqmi sumaq sonqo kasqanmantapas (1 Crónicas 29:10-13). Mateo 6:9-13 textopin tarinchis imayna mañakunapaq Jesuspa yachachisqanta (leey). Chay mañakuypin yachachiwanchis Diospa sutinta yupaychanapaq otaq hatunchanapaq. Mañakullasunmantaqmi Diospa Reinon hamunanpaq, hanaq pachapi hina kay Hallp’api munaynin ruwakunanpaqpas. Rikusqanchis hina Jesusqa Diospa munayninmantaraqmi mañakuyta yachachiran chaymantañan yachachiran ima necesitasqanchistapas mañakunapaq. Ñoqanchispas ñawpaqtan Diospa munasqantaraq mañakunanchis, qhepatañan ima necesitasqanchistapas.

13. ¿Ima ninmi Biblia hayk’a tiempopi mañakunamanta?

¹³ ¿Hayk’a tiempopi mañakunanchis? Sapanchisña hukkunawanña mañakuqtinchispas Bibliaqa manan ninchu hayk’a tiempopi mañakunanchista. Pisi tiempollatapas mañakusunmanmi mikhunapaq mañakusqanchista hina, otaq unay tiempopas imaynan sapallanchispi sonqonchista kicharispa mañakunchis hinata (1 Samuel 1:12, 15). Jesusmi ichaqa huchacharan runakunaq rikunallanpaq unay mañakuqkunata (Lucas 20:46, 47). Jehová Diosqa manan uyarinchu chhayna mañakuqkunata. Payqa uyarin tukuy sonqowan mañakuqkunatan. Ima necesitasqanchisman hina imaynapi tarikusqanchisman hinan mañakunanchis, unay tiempotapas otaq pisi tiempotapas.

14. ¿Ima ninantan Biblia nin, “mañakushallaychispuni”, nispa? ¿Ima saminchaymi kan ñoqanchispaq?

¹⁴ ¿Hayk’a kutitan mañakunanchis? Biblia nin:  “Mañakushallaychispuni”, nispa (Romanos 12:12; 1 Tesalonicenses 5:17). Chaypiqa manan ch’isiyaqnintin mañakunanchismantachu rimashan. Aswanmi sapa p’unchay mañakuypi Jehová Diosta agradecekunanchis sumaq kayninmanta, mañakunanchistaq allin ñanninpi pusawananchispaq, sonqochawananchispaq, kallpachawananchispaqpas. Jehová Diosqa munanmi hayk’a kutitapas mañakunanchista, unayta otaq pisitapas. ¡Hatun saminchaymi chayqa! Sichus Yayanchiswan rimayta saminchayta hina rikusun chayqa sapa kutillan paywan rimasun.

15. ¿Ima rayku sapallanchispi otaq hukkunawan mañakuspa “amén” nispa tukunanchis?

¹⁵ ¿Ima rayku “amén” nispa tukunanchis? “Amén” simiqa “chay hina kachun” otaq “arí” ninanmi. Biblian ñawpa runakunaq mañakusqanmanta willaspa rikuchin, hukkunawanña sapanchispiña mañakuqtinchispas “amén”, nispa tukunata (1 Crónicas 16:36; Salmo 41:13). Mañakusqanchispi “amén”, nispa tukusqanchismi rikuchin sonqomanta mañakusqanchista. Hukkunawan mañakuspa “amén” (ch’inlla otaq kunkawan) nisqanchismi rikuchillantaq chay hina kachun nisqanchista (1 Corintios 14:16).

16. ¿Kutichimunchu Jehová Dios mañakusqanchisman?

¹⁶ ¿Kutichinpunichu Jehová Dios mañakusqanchisman? ¡Arí, kutichinpunin! ‘Mañakusqata Uyariq’ Jehová Diosqa millonninpi runakunaq sonqomanta mañakusqankutaqa kutichinpunin (Salmo 65:2). Mañakuyninchismanqa imaymananmantan kutichimunman.

17. ¿Imaynapin yachanchis angelninkunawan kamachin runakunapiwan mañakuyninchisman Diospa kutichimusqanta?

¹⁷ Jehová Diosqa angelninkunawan, kamachisqan  runakunapiwanmi mañakusqanchisman kutichimun (Hebreos 1:13, 14). Askha runakunan Bibliamanta astawan yachayta munaspa Diosmanta mañakuranku, mañakusqanku qhepallamantaq Jehová Diospa kamachin visitaran. Chaykunan rikuchin Reinomanta willakuyta angelkunaq aparisqanta (Apocalipsis 14:6). Sasachakuypi tarikusqanchismanta mañakuqtinchispas, Jehová Diosqa huk cristianomasinchiswanmi yanapachiwasunman (Proverbios 12:25; Santiago 2:16).

18. ¿Imaynatan Jehová Dios kamachinkunaq mañakuyninta kutichin santo espiritunwan Simin Qelqapiwan?

 ¹⁸ Jehová Diosqa Bibliawan santo espiritunpiwanmi kamachinkunaq mañakusqanman kutichimullantaq. Sasachakuykunata atipanapaq mañakuqtinchisqa santo espiritunwanmi kallpachawasun pusariwasunpas (2 Corintios 4:7). Imatapas allinta ruwanapaq mañakuqtinchispas Simin Qelqawanmi yanapawanchis. Bibliata estudiaspa, Bibliamanta rimaq huk qelqakunatapas leespan tarisunman kawsayninchispaq allin yachachikuykunata. Hinaspapas Bibliapi kaq kamachikuykunatan yuyarichiwasunman. Yuyarisunmanmi huñunakuykunapi otaq ñoqanchispi interesakuq anciano yuyaychawaqtinchis (Gálatas 6:1).

19. ¿Imatan yuyarinanchis mañakusqanchisman mayninqa mana kutichisqanta hina qhawariqtinchis?

¹⁹ Yaqapaschá mayninpiqa mañakusqanchista Jehová Dios mana usqhayllachu kutichimunman, ichaqa manan chay raykuchu nisunman, manan uyariwanchu, nispa. Jehová Diosqa kutichimunqan mañakusqanchista ichaqa paypa munasqanman hina yuyaykusqan tiempopitaq. Payqa yachanmi ima necesitasqanchistapas yachantaqmi imaynanmanta yanapawananchistapas. Payqa munan sapa kutilla ‘mañakunanchista’, ‘maskhananchista’,  ‘waqyakunanchistapas’ (Lucas 11:5-10). Chayta ruwaspan rikuchisun tukuy sonqowan mañakusqanchista, cheqaq iñiyniyoq kasqanchistapas. Hinaspapas manapaschá reparasunmanchu mañakusqanchisman kutichisqanta. Kaypi reparasun, sasachakuypi kasqanchismanta mañakuqtinchis manapaschá chinkachinqachu sasachakuyninchista, ichaqa kallpachawasunmi aguantanapaq (leey Isaías 40:29).

20. ¿Ima raykun tukuy sonqowan mañakushanallanchis?

²⁰ Teqsimuyu Kamaqtan anchata agradecekunchis munasqanman hina waqyakuqkunaq sispallanpi kasqanmanta (leey Salmo 145:18). Tukuy sonqowan mañakushallasun. Chhaynata mañakuspallan mañakuyta Uyariq Jehová Diosman astawan asuykusun.