QHAWARIY Cainta Abeltapas. Iskayninkun wiñankuña. Cainqa chakrapin llank’an imaymana muhukunata, frutakunata, verdurakunatawan.

Abelqa ovejakunatan uywan. Payqa kusikunmi ovejachakunata michispa. Chaykuna wiñaspaqa pisi tiempollapi askhaman miran.

Huk p’unchaymi Cainpas Abelpas Diosman regalota apanku. Cainmi apan chakrapi llank’asqan rurukunata. Abeltaq allinkaq ovejanta. Jehová Diosqa kusikunmi Abelwan regalonwanpas. Manan ichaqa kusikunchu Cainwan nitaq regalonwanpas. ¿Ima rayku?

Manan Abelpa regalon Cainpa regalonmanta aswan allin kasqan raykullachu. Abel allin runa kasqan raykun. Payqa munakunmi Jehová Diostapas wayqentapas. Cainmi ichaqa millay runa; manan wayqenta munakunchu.

Chay raykun Diosqa Cainta nin allin kaqta ruwananpaq. Cainmi ichaqa mana kasukunchu. Sinchitan phiñakun wayqen Abelta Diospa munakusqanwan. Cainmi Abelta nin: “Haku campota”, nispa. Chaypin, sapallanku kashaqtinku Cainqa wayqenta p’anan. Sinchita p’anaspan wañuchin. ¿Manachu millay chay ruwasqan?

Abel wañupunña chaypas Diosqa yuyashallanmi. Abelqa allin runan karan, Jehová Diosqa manan hayk’aqpas qonqanchu pay hina runakunata. Chay raykun Jehová Diosqa Abelta kawsarichinqa. Chay tiempopiqa manañan hayk’aqpas Abelqa wañunqachu. Wiñaypaqmi kay Allpapi kawsanqa. ¿Allinchu kanman pay hina runakunata reqsiy?

Caín hina runakunatan ichaqa Dios mana munanchu. Chay rayku wayqenta wañuchisqan qhepaman, Diosqa familianpa ladonmanta Cainta karuman qarqoran. Ripuspan Cainqa huknin pananta pusarikuran, paymi warmin kapuran.

Tiempoq pasasqanmanmi Cainqa wawakunayoq karan. Adanpa qhari wawankunapas warmi wawankunapas casarakuspan wawakunayoq karanku. Pisi tiempollapin Allpapi runakunaqa askhata miraranku. Wakillantapas reqsisun.