ALLPAPI runakuna yapaqtinmi yaqa llapan runa Caín hina mana allinkunata ruwaranku. Huk runan ichaqa hukniray karan. Chay runaq sutinmi Enoc. Payqa mana manchakuq allin runa karan. Paypa wiñaymasin runakunaqa millaymi karanku, paymi ichaqa Diospa munayninta ruwaspallapuni kawsaran.

¿Ima raykun chay runakuna mana allinkunata ruwaranku? Kayta yuyariy: ¿Pin huchallichiran Adantapas Evatapas Diospa hark’asqan ruruta mikhuchispa? Millay angelmi. Biblian sutichan Satanás nispa. Paymi munan llapanchispas millay kananchista.

Huk p’unchaymi Jehová Dios Enocta kamachiran runakunaq mana uyariy munasqanta willananpaq. Kaytan niran: ‘Diosmi wañuchinqa llapa millay runakunata,’ nispa. Chay willasqanqa sinchitapaschá runakunata phiñachiran. Enoctapas wañuchiytapaschá munaranku. Chay raykun Enocqa mana manchakuq kanan karan Diospa nisqanta runakunaman willananpaq.

Diosqa manan unay tiempotachu Enoctaqa kawsachiran chay millay runakunawan. 365 watallatan kawsaran. ¿Ima raykun ninchis “365 watallata” nispa? Chay tiempopi runakunaqa aswan kallpasapan karanku kunan tiempopi runakunamanta, aswan unaytan kawsarankupas. ¡Arí; Enocpa churin Matusalenpas 969 watatan kawsaran!

Enocpa wañusqan qhepamanqa aswan millaymanmi runakuna tukuranku. Bibliaq nisqan hinan ‘sonqonkupi lliw yuyaykusqankupas mana allinllapunin karan,’ ‘kay pachantinpi lliw mana chanin-kaypas q’oñirirqan.’

¿Ima raykun sinchita q’oñiriran chay tiempopi millay kawsay? Satanasmi runakunata tanqaran mana allinkunata ruwanankupaq. ¿Imaynatan chayta ruwaran?