ARCAMAN mana haykuq runakunaqa kaqllatan kawsasharanku. Manan creerankuchu millp’uq para unu hamunanta. Nishutachá asikuranku. Chaymantan ichaqa manaña asikurankuchu.

Qonqayllamantan paramuran. Valdewanpas unuta hanaq pachamanta hich’aykamunkuman hinata. ¡Noeqa cheqaqtan rimasqa! Manañan ichaqa pipas arcaman haykuyta atiranchu. Jehová Diosmi arcaq punkunta allinta wisq’asqa.

Usqhayllan unuqa panpakunaman hunt’asqa. Hatun mayukuna hinan unuqa puririsqa. Sach’akunata, hatun rumikunata apaspan sinchita chanrarayaran. Runakunaqa mancharikurankun. Orqokunamanmi wicharanku. ¡Maytachá pesapakuranku Noepa willasqanta mana kasukusqankumanta, manaraq arca wisq’akushaqtin haykunankuta yuyarispa! Kunanqa manañan haykuyta atirankuchu.

Astawanmi unuqa hunt’aykuran. Tawa chunka tuta tawa chunka p’unchaymi pararan. Lomakunamanmi unuqa ayparan, hatun orqokunapas manañan rikukuranchu. Diospa nisqan hina, arcaman mana haykuq runakunapas animalkunapas wañuranku. Arcapi kaqkunan ichaqa qespichisqa karanku.

Noepas churinkunapas allintan arcata ruwasqaku. Unu hoqariqtintaq arcaqa unupi tuyturan. Para pasaqtinmi, Inti k’anchayta qallariran. ¡Musphanapaqmi karan! Allpantinpin unulla karan. Arcallan unu patapi tuytusharan.

Manañan hatun runakuna karanchu. Manañan kutimunkumanñachu runakunata ñak’arichinankupaq. Llapankun wañuranku, mamankupas millay runakunapas. Ichaqa, ¿iman sucederan taytankuta?

Hatun runakunaq taytanqa manan ñoqanchis hina runachu karanku. Runakunawan kuska tiyanankupaq hanaq pachamanta urayamuq angelkunan karan. Chaymi millp’uq para unupiqa mana runakunawan kuskachu wañuranku. Aycha cuerponkuta saqespan ángel hina hanaq pachaman kutipuranku. Manañan ichaqa Diospa familian angelkunawan kuskañachu karanku. Satanaspa angelninkunamanmi tukupuranku. Kay angelkunatan Bibliapi sutichakun supaykuna nispa.

Dios wayrachiqtinmi millp’uq para unuqa pisiyaran. Pisqa killa qhepatataq arcaqa orqo patapi takyaran. Askha p’unchaykunamantan arcapi kaqkunaqa hawata qhawarispa orqo patakunata rikuranku. Pisi pisimantan unuqa ch’akiran.

Chaymi Noeqa cuervo sutiyoq phalaq animalta arcamanta kachariran. Kaymi pisita phalaspa arcaman kutipusqa mana maypipas tiyayta atispa. Chaytan ruwaran askha kutita, sapa kutimuspataq arca patapi tiyaykuran.

Maykaman unu ch’akisqanta yachananpaqmi Noeqa palomatañataq arcamanta kachariran. Kaypas kutinpullarantaqmi mana maypi tiyayta atispa. Hukmanta kachariqtinmi palomaqa kutimusqa olivo sach’aq raphinta simichanpi apamuspa. Ñan unu ch’akisqaña. Kinsa kutipi kachariqtinmi palomaqa manaña kutimusqachu, tarisqañan maypi tiyananta.

Kunanqa Diosmi Noeta rimapayaran. Niran: ‘Arcamanta lloqsiy familiaykiwan, animalkunapiwan,’ nispa. Huk wata pasaytan arca ukhupi tiyaranku. ¡Anchatachá kusikuranku arcamanta lloqsispaqa!