MILLP’UQ para unu qhepatan wakin runakunaqa Ur sutiyoq llaqtaman ripuranku. Ur llaqtaqa hatunmi karan sumaq wasikunayoq. Chaypi tiyaq runakunan ichaqa pantasqa dioskunata yupaycharanku. Chaytan Babelpipas ruwaranku. Ur, Babel llaqtakunapi tiyaq runakunaqa manan Noé hinachu, nitaq churin Sem hinapaschu Jehová Diosta serviqku.

Millp’uq para unumanta 350 wata qhepatan hunt’aq runa Noé wañuran. Iskay wata qhepallamanmi naceran kay dibujopi rikusqayki runa. Diospa akllasqan sumaq runan karan. Sutinmi Abrahán. Ur llaqtapin familianwan tiyaran.

Huk kutinmi Jehová Dios Abrahanta niran: ‘Ripuy Ur llaqtaykimanta taytaykiq wasinmantapas rikuchisqayki allpaman,’ nispa. ¿Kasukuranchu Diosta, Ur llaqtapi allinpi tiyasqanta saqespa? Arí kasukuranmi. Diosta imaymanapi kasukusqan raykun Abrahanqa Diospa amigon karan.

Abrahanpas wakin familianpas paywan kuska ripuranku Ur llaqtamanta. Taytan Tarepas, sobrinon Lotpas, warmin Sarapas. Tiempoq pasasqanmanmi llapanku chayaranku Harán sutiyoq allpaman, chaypin Taré wañuran. Ur llaqtamantaqa karupin karanku.

Chaymantan Abrahanqa Haranmanta familiantin ripuran Canaán sutiyoq suyuman. Chaypin Jehová Dios niran: ‘Mirayniykimanmi kay allpata qosaq,’ nispa. Chay suyupin Abrahán qhepakuran, chaypin tiyaran telamanta ruwasqa karpakunapi.

Diosmi Abrahanta yanaparan chaymi paypa ovejankunapas huk animalninkunapas askhata miraran, kamachinkunapas pachakninpin karan. Paywan Sarawanmi ichaqa mana wawayoq karanku.

Abrahán isqon chunka isqonniyoq watanpi kashaqtinmi Jehová Dios niran: ‘Askha llaqtakunaq taytanmi kanki,’ nispa. ¿Imaynatan Abrahanpas Sarapas wawayoq kankuman nishu machu-payaña kashaspa?