¿RIKUSHANKICHU imatan Abrahán ruwashan? Cuchillotan hap’ishan churinta wañuchinanpaq. ¿Ima rayku? Ñawpaqta yachasun imaynapin Abrahanwan Sarawan wawayoq karanku.

Yuyariy, Diosmi qhari wawayoq kanankupaq prometeran. Chayqa mana creenapaq hinan karan Abrahán Sarawan machu-payaña kasqanku rayku. Abrahanmi ichaqa iñiran ima sasatapas Diospa atinanta. Chay rayku, ¿iman sucederan?

Diospa prometesqanmanta huk watañan pasasqa. Chaymi Abrahán 100 watayoq Sarapas 90 watayoq kashaqtinku Isaac wawayoq karanku. ¡Diosqa hunt’asqan prometesqanta!

Isaac waynaña kashaqtinmi Jehová Diosqa Abrahanpa iñiyninta wateqayman churaran. ‘¡Abrahán!’ nispan waqyaran, Abrahantaq kutichiran: ‘¡Kaypin kashani!,’ nispa. Diosmi niran: ‘Munasqayki sapallan churiyki Isaacta pusay, hinaspa ñoqaq nisqay orqo pataman riy. Chaypi payta wañuchispa sacrificiopi haywawanki,’ nispa.

¡Chayqa llakichiranmi Abrahanta, churinta anchata munakusqan rayku! Diosqa prometesqan Abrahanpa wawankuna Canaanpi tiyanankupaq. Ichaqa, ¿imaynatan chay hunt’akunman churin Isaac wañuqtin? Chaytan Abrahanqa mana entienderanchu, ichaqa kasukuranmi Diospa kamachisqanta.

Orqoman chayaspan Abrahanqa Isaacta wataran, altar ruwasqan patamantaq churaran. Chaymantan cuchillota horqoran churinta wañuchinanpaq. Chayllamanmi Diospa angelnin waqyamuran: ‘¡Abrahán, Abrahán!,’ nispa. Abrahantaq kutichiran: ‘¡Kaypin kashani!,’ nispa.

Diosmi niran: ‘Ama waynachata wañuchiychu amataq imanaypaschu, yachaniñan ñoqapi iñisqaykita, manan sapan churiyki qoytapas hark’akuwarqankichu,’ nispa.

¡Tukuy sonqowanmi Abrahanqa Diospi iñiran! Yacharanmi, Jehová Diosqa imapas ruway atisqanta, Isaac wañupuqtinpas kawsarichinpunanta. Diosqa manan munaranchu Abrahán churin Isaacta wañuchinanta; chaymi huk ovejata ch’aphra-ch’aphrapi ch’arwichispa Abrahanta nisqa Isaacpa rantinta chay ovejata ñak’aspa haywananpaq.