KAYPI rikusqayki qharikunaqa hukkunatan tanqashanku llank’anankupaq. ¡Qhawariy chay runata, hasut’iwanmi llank’aqta waqtashan! Llank’aqkunaqa Jacobpa familianmi, israelitakuna nispan sutichanku. Llank’achiqkunataq egipciokuna. Paykunaq kamachinmi israelitakunaqa kapuranku. ¿Imaynatan chay sucederan?

Jacobpa familianqa askha watan Egipto suyupi thakpi kawsaranku. Kamachikuq José paykunataqa qhawariran. José wañupuqtinmi Egipto suyupi huk Faraón kamachiran, payqa manan israelitakunata munakuranchu.

Kay millay sonqoyoq Faraonqa israelitakunatan kamachinman tukuchiran. Sinchi millay capatazkunatan churaran israelitakunata kamachinanpaq. Kaykunan israelitakunata tanqaran Faraonpaq llaqtakunata ruwanankupaq. Israelitakunaqa astawanmi yapakusharanku. Chaymi Egipto suyupi runakunaqa manchakuranku, askha kaspa paykunamanta aswan kallpayoq kanankumanta.

¿Imatan Faraón ruwaran? Israelita warmikuna wachakuqtin yanapaq parterakunatan niran: ‘Naceqtin hinan llapa qhari wawakunata wañuchinkichis,’ nispa. Diosta manchakuq kaspan kay warmikunaqa mana wañuchirankuchu qhari wawakunata.

Chaymi Faraonqa llaqtantinta kamachiran: ‘Wañuchiychis Israelpi llapa qhari wawakunata. Warmi wawallata ama wañuchinkichischu,’ nispa. ¿Allinchu karan chay kamachisqan? Yachasun imaynatan huk qhari wawata qespichiranku.