¿PIKUNATAN Dina visitashan? Canaán suyupi tiyaq sipaskunatan. ¿Kusikuranchu taytan Jacob kay ruwasqanwan? Kayta kutichinaykipaq yuyariy imatan Abrahanpas Isaacpas yuyaykuranku Canaanpi tiyaq warmikunamanta.

¿Munaranchu Abrahán churin Isaac Canaán llaqta warmiwan casarakunanta? Manan. ¿Munarankuchu Isaacpas Rebecapas Jacob wawanku Canaán llaqta warmiwan casarakunanta? Manan. ¿Ima rayku?

Canaanpi tiyaq runakunaqa pantasqa dioskunatan yupaycharanku. Mana allin runakunan karanku paykunawan casarakunapaq huñunakunapaqpas. Chay raykun Jacobqa mana munaranchu ususin Dina Canaanpi warmikunawan huñunakunanta.

Dinaqa sasachakuypin tarikuran. ¿Rikushankichu imaynatan chay cananeo Dinata qhawashan? Siquemmi sutin. Huk p’unchaymi chay sipaskunata Dina visitashaqtin, Siquem runa Dinata obligaran paywan puñunanpaq. Kayqa manan allinchu karan, casarakusqan warmillawanmi qhariqa puñunan. Siquem runa Dinata abusasqanmi nishu sasachakuykunata qallarichiran.

Kayta yachaspan Dinaq turankunaqa sinchita phiñakuranku. Simeonwan Leviwanmi aswantaqa phiñakuranku, chaymi espadankuta aparikuspa llaqtaman qonqaylla haykuranku. Paykunan wayqenkunawan Siquem runata llapa qharikunatawan wañuchiranku. Kay mana allin ruwasqankun taytanku Jacobta sinchita phiñachiran.

¿Imaynatan kay sasachakuykuna qallariran? Diospa kamachisqanta mana kasukuq runakunawan Dinaq huñunakusqanwanmi. Ama ñoqanchisqa chhayna runakunawan huñunakusunchu.