KAYPI rikusqayki waynachakunaqa hukniraymi kanku, ¿riki? ¿Yachankichu sutinkuta? Flecha hap’iqmi Esaú, oveja michiq waynachataq Jacob.

Esaupas Jacobpas, Isaacpa Rebecaq mellizo wawankunan karan. Isaacqa Esaú churintan munakuran, animalkunata wañuchispa familianpa mikhunanpaq apamusqan rayku. Rebecan ichaqa Jacobta astawan munakuran, sumaq llamp’u sonqo kasqan rayku.

Abuelonku Abrahanqa kawsasharanraqmi, anchatachá Jacobqa kusikuran Jehová Diosmanta rimapayaqtin. 175 watanpin Abrahanqa wañupuran, mellizokuna 15 watayoq kashaqtinku.

Tawa chunka watanpin Esauqa casarakuran Canaán suyumanta iskay warmikunawan. Chayqa anchata llakichiran Isaactapas Rebecatapas, chay warmikuna Jehová Diosta mana yupaychasqanku rayku.

Huk kutinmi Esauqa wayqen Jacobpaq sinchita phiñakuran. Kuraq churinmanmi Isaacqa saminchayta qonan karan. Jacobmanta kuraq kasqan raykun Esaú saminchayta suyakuran. Esauqa Jacobmanmi vendesqaña saminchay chaskinanta. Iskaynin waynachakuna naceqtinkun ichaqa, Dios willasqaña chay saminchayta Jacob chaskinanpaq. Chhaynan karan. Jacobmanmi Isaacqa saminchayta qoran.

Chayta yachaspan Esauqa Jacobpaq phiñakuran. Sinchi phiñasqa kaspanmi Jacobta wañuchiyta munaran. Chayta yachaspan Rebecaqa anchata llakikuran. Chay raykun qosan Isaacta niran: ‘Jacobpas Canaán warmikunawan casarakuqtinqa sinchi uma nanaymi kanqa,’ nispa.

Chay raykun Isaacqa churin Jacobta niran: ‘Aman Canaán warmikunawanqa casarakunkichu. Aswan riy Haranta, abueloyki Betuelpa llaqtanta. Chaypi casarakamuy Labanpa huknin ususinwan,’ nispa.

Taytanta kasukuspan Jacobqa familiankuq tiyasqan Harán llaqtata riran.