¿YACHANKICHU pikunawanmi Jacob rimashan? Askha p’unchaykunata purispan Jacobqa p’uytuq qayllanpi kay runakunawan tuparan. Ovejankutan michisharanku. Jacobmi paykunata tapuran: ‘¿Maymantan kankichis?,’ nispa.

‘Harán llaqtamantan kayku,’ nirankun.

‘¿Reqsinkichischu Labanta?’ nispan Jacob tapuran.

‘Arí, qhawariy, ususin Raquelmi taytanpa ovejankunawan hamushan,’ nispan kutichiranku. ¿Rikushankichu Raquel asuykusqanta?

Taytan Labanpa ovejankunatan Raquelqa qatimusharan, payta rikuspan Jacobqa p’uytupi rumita horqoran ovejakuna unuta ukyanankupaq. Chaymantataq Jacobqa Raquelta much’aykuspa willaran pi kasqanta. Raquelqa anchatan kusikuran, wasinta rispataq taytan Labanman willaran kaykunamanta.

Labanqa kusikuranmi wasinpi Jacob qhepakunanmanta. Ususin Raquelwan casarakuy munasqanta willaqtinpas Labanqa kusikuranmi. Qanchis watan ichaqa llank’anki ususiy Raquelwan casarakunaykipaq, niranmi. Raquelta anchata munakuspan Jacobqa llank’aran. Casarakunanpaq tiempo chayamuqtin, ¿iman sucederan?

Raquelpa kuraqnin Leatan Labanqa Jacobman qoran Raquelpa rantinta. Qanchis watatawan Labanpaq llank’ayta munaqtinmi Raqueltapas Jacobman qollarantaq. Haqay tiempopiqa hinallatan Diosqa qhawaran qharikuna iskay kinsa warmiyoq kanankuta. Kunanmi ichaqa Bibliaq nisqan hina ch’ulla warmillayoq kananku.