CHUNKA qanchisniyoq watallanpin Joseta Egipto suyuman aparanku. Chaypin venderanku Potifar sutiyoq runaman. Potifarqa Egipto suyupi kamachiqpaqmi llank’aran, Faraón nispan chay kamachiqta suticharanku.

Joseqa allintan llank’aran Potifar patronninpaq. Chaymi, kuraq kaqtin Joseman wasinta saqeran qhawananpaq. Chhaynaqa, ¿ima raykun José carcelpi kashan? Potifarpa warminmi wisq’achiran.

Wiñaspanmi Joseqa sumaq rikch’ayniyoq runa karan, chaymi Potifarpa warminqa paywan puñuyta munaran. Joseqa manan munaranchu, yacharanmi huk runaq warminwan puñuyqa mana allin kasqanta. Chaymantan Potifarpa warminqa anchata phiñakuran. Qosan hamuqtintaq llullakuspa willaran: ‘¡Chay millay runa José, ñoqawan puñukuyta munaran!,’ nispa. Warminpa nisqanta uyarispan Potifarqa Josepaq sinchita phiñakuran. Carcelpitaq wisq’achiran.

Pisi tiempollapin carcel qhawaq repararan José allin runa kasqanta. Chay raykun churaran llapa presokunata qhawananpaq. Huk kutinmi Faraón phiñakuran copa haywaqwan t’anta ruwaqwanpas, iskayninkutataq carcelpi wisq’achiran. Huk tutan sapankanku mosqokuranku mana hayk’aq mosqokusqankuta, ichaqa manan yacharankuchu mosqoyninkuq sut’inchayninta. Paqaristinmi José nin: ‘Willawaychis mosqokusqaykichista,’ nispa. Chaymi Joseqa Diospa yanapayninwan sut’incharan mosqokusqankuta.

Copa haywaqtan José niran: ‘Kinsa p’unchaymantan Faraonqa horqochisunki, hukmantataq copanta haywanki,’ nispa. Nirantaq: ‘Lloqsispayki Faraonman ñoqamanta willarinki, hinaspa yanapawanki kaymanta lloqsinaypaq,’ nispa. T’anta ruwaqtan ichaqa niran: ‘Kinsa p’unchaymantan Faraonqa seq’ochisunki,’ nispa.

Kinsa p’unchaymantan hunt’akuran Josepa nisqan. Faraonqa seq’ochiranmi t’anta ruwaqta. Copa haywaqtan ichaqa carcelmanta horqoranku, hukmantataq Faraonpaq llank’aran. ¡Manan ichaqa Joseta yuyariranchu! Manan Faraonman willanchu, chaymi Joseqa carcelpiraq kashan.