¡QHAWARIY kaypi sucedesqanta! Moisesmi Puka lamar-qochaman tawnanta haywarishan. Paywan kuska qespichisqa kaqkunaqa israelitakunan. Faraonpas soldadonkunapas unupin heq’epashanku. Qhawarisun imaynatan kay sucederan.

Yachasqanchis hina, chunka kaq muchuchiy qhepamanmi Faraonqa israelitakunata niran Egipto suyumanta ripunankupaq. 600.000 qharikunan lloqsiranku, warmikunantin wawakunantin. Huk runakunapas Jehová Diospi iñipuspan lloqsiranku israelitakunawan kuska. Egipto suyumanta lloqsispaqa llapankun aparanku ovejankuta, cabrankuta, wakankutapas.

Manaraq lloqsishaspan israelitakunaqa egipciokunamanta mañakuranku qolqemanta qorimanta alhajakunata, p’achakunatawan. Chunka kaq muchuchiywanmi egipciokunaqa sinchita manchakuranku. Chaymi israelitakunaman qoranku llapa mañakusqankuta.

Puka lamar-qochaman chayaspan, chaypi samaranku. Chay qhepamanmi Faraonpas runankunapas pesapakuranku israelitakuna kacharisqankumanta. ‘¡Imapaqmi kachariranchis kamachi runanchiskunata!,’ nispa.

Chaymi Faraonqa israelitakunata kutichimuyta munaran. Carretanta wakichispa soldadonkunata pusarikuran. Chaymantan israelitakunaq qhepanta phawaranku 600 allinnin carretakunawan, Egipto suyupi lliw carretakunawanpas.

Faraonta carretakunantinta hamuqta rikuspan israelitakunaqa sinchita mancharikuranku. Manan maymanpas ayqekuyta atirankuchu. Puka lamar-qochan chinpankupi kasharan, qhepankupitaq egipcio soldadokuna. Jehová Diosmi ichaqa phuyuta churaran, llaqtanta egipciokunamanta pakananpaq. Chay raykun egipciokunaqa israelitakunata mana rikuyta atirankuchu aypanankupaq.

Moisestan Jehová Dios kamachiran Puka lamar-qochaman tawnanta haywarinanpaq. Chayta ruwaqtinmi Jehová Diosqa inti lloqsimuy ladomanta sinchita wayrachimuran. Chaymi Puka lamar-qochaqa iskayman t’aqakuran, unutaq perqa hina karan pañankupipas lloq’enkupipas.

Chay qhepamanmi israelitakunaqa lamar-qochaq chawpinta, ch’aki allpanta chinparanku. Millonninpi runakunapas animalkunapas unaypin chinparanku. Chayraqmi egipciokunaqa israelitakunata rikuranku, chaymi paykunapas israelitakunaq qhepanta Puka lamar-qochaman haykuranku.

Chayta ruwaqtinkun Diosqa carretankuq ruedankunata urmachiran. Egipciokunaqa anchata mancharikuspan qapariranku: ‘¡Ayqesun! Jehová Diosmi israelitakuna rayku ñoqanchiswan maqanakushan,’ nispa. Manañan ichaqa atirankuchu.

Moisestan Jehová Diosqa kamachiran tawnanta lamar-qochaman haywarinanpaq, dibujopi rikusqayki hina. Chaymi unuqa perqa hina kasqanmanta thunispa egipciokunata carretakunantinta p’anparan. Llapa soldadokunan lamar-qochaman haykusqaku. ¡Manan hukllapas qespiranchu!

¡Diospa llaqtanqa anchatan kusikuran qespichisqa kasqankumanta! Jehová Diosta agradecekuspan qharikuna takiranku: ‘Jehová Diosmi hatun atiyninta rikuchiwanchis maqanakuypi atipaspa. Caballokunatapas sillakuqkunatapas lamar-qochamanmi wikch’uyun,’ nispa. Moisespa panan Miriammi panderetanta horqoran, chaytan llapa warmikunapas ruwasqaku. Kusikuymantan tususpa takiranku: ‘Jehová Diosmi hatun atiyninta rikuchiwanchis, maqanakuypi atipaspa. Caballokunatapas sillakuqkunatapas lamar-qochamanmi wikch’uyun,’ nispa.