HOREB orqokaman Moisesqa chayaran ovejankunata michispa. Chaypin rikuran rawrashaq ch’aphrata, ¡manan ichaqa ruphasqachu!

‘¡Imataq kayri! Allinta qhawaramusaq,’ nisqan Moisesqa. Asuykuqtinmi ch’aphra ukhumanta kayta uyarisqa: ‘Ama astawanqa asuykamuychu. Ch’uya allpapin sarushanki, usutaykita ch’utikuy,’ nispa. Chaytaqa Diospa kachamusqan angelmi rimapayamuran, chaymi payqa uyanta pakakuran.

Diosmi nin: ‘Rikunin Egipto suyupi llaqtaypa ñak’arisqanta. Paykunatan kacharichisaq, qanmi rinki llaqtayta horqomunaykipaq,’ nispa. Jehová Diosqa Canaán sumaq suyumanmi llaqtanta pusanan karan.

Moisestaq Diosta niran: ‘Pitaq ñoqari kani. ¿Imaynatan chayta ruwayman? Riqtiyqa tapuwanqakuchá: ¿Pin kachamurasunki? Hinari, ¿ima nisaqtaq paykunata?,’ nispa.

Diostaq Moisesta niran: ‘Kaytan ninki: Abrahanpa, Isaacpa, Jacobpa JEHOVÁ Diosninmi qankunaman kachamuwan,’ nispa. Chaymantan Jehová Diosqa nillarantaq: “Kay sutiymi wiñaypaq”, nispa.

Moisestaq kutichiran: ‘¿Qanpa kachawasqaykita mana creewaqtinkuri?,’ nispa.

Diostaq tapuran: ‘¿Imatan makiykipi hap’ishanki?,’ nispa.

Moisestaq, ‘tawnatan,’ niran.

‘Pampaman chanqay,’ nispan Dios niran. Chayta ruwaqtinmi tawnaqa mach’aqwayman tukuran. Huk milagrotawanmi Jehová Diosqa rikuchiran. Niranmi: ‘Makiykita p’achayki ukhuman winay,’ nispa. Chaytan Moisés ruwan, makinta horqoqtintaq, ¡rit’i hina yuraq karan! Lepra onqoywanpas kashanman hina. Jehová Diosqa atiytan Moisesman qoran huk milagrotawan ruwananpaq. Tukunapaqtaq niran: ‘Kay milagrokunata rikuspan israelitakunaqa creenqaku ñoqaq kachasqayta,’ nispa.

Moisesqa wasinta kutispan Jetrota niran: ‘Ama hina kaspa, Egipto suyupi familiaykuna watukuqmi kutisaq,’ nispa. Chaymi Jetroqa Moisesta niran, ‘rillay’ nispa, Moisestaq Egipto suyuman kutiran.